ଅଜବ ପ୍ରେମର ଗଜବ କାହାଣୀ, ସ୍ଵାମୀଙ୍କୁ ଛାଡି ପ୍ରେମିକାର ହାତ ଧରିଲା ସ୍ତ୍ରୀ

ବିହାରର ବେଗୁସରାଇରୁ ଏକ ଅଜବ ପ୍ରେମର ଗଜବ କାହାଣୀ ସାମ୍ନାକୁ ଆସିଛି । ଏଠାରେ ଜଣେ ନବ ବିବାହିତ ଝିଅ ନିଜ ସ୍ୱାମୀଙ୍କ ସହ ରହିବାକୁ ମନା କରିଦେଇଛି କାରଣ ସେ ପୂର୍ବରୁ ହିଁ ଅନ୍ୟଜଣେ ଝିଅଙ୍କ ସହିତ ସମଲିଙ୍ଗୀ ସମ୍ପର୍କରେ ରହି ଆସିଛନ୍ତି । କେବଳ ଏତିକି ନୁହେଁ ମାମଲାଟି ସେତେବେଳେ ଜଣାପଡିଥିଲା ଯେତେବେଳେ ନବ ବିବାହିତା ଝିଅର ପ୍ରେମିକା ପୋଲିସ ନେଇ ତାଙ୍କ ଘରେ ପହଂଚି ଉକ୍ତ ଯୁବତୀଙ୍କୁ ସାଥିରେ ନେଇଯିବା ପାଇଁ କହିଥିଲା ।

ସୂଚନା ଅନୁଯାୟୀ ରାଞ୍ଚି ନିବାସୀ ପୂଜା ଜୁନ୍ ୧୪ ତାରିଖ ଦିନ ବେଗୁସରାଇର ଅଙ୍କିତ କୁମାର ନାମକ ଜଣେ ଯୁବକଙ୍କୁ ବିବାହ କରିଥିଲେ । ବିବାହ ପରେ ପୂଜା ତାଙ୍କ ସ୍ୱାମୀଙ୍କ ସହ ବେଗୁସରାଇ ଆସିଥିଲେ, କିନ୍ତୁ ୧୦ ଦିନ ପରେ ସେ ତାଙ୍କ ସହ ରହିବାକୁ ମନା କରି ଦେଇଥିଲେ । କାରଣ ସେ ଗତ ଦୁଇ ବର୍ଷ ଧରି ତାଙ୍କର ଜଣେ ସାଥୀଙ୍କ ସହ ସମଲିଙ୍ଗୀ ସମ୍ପର୍କରେ ରହୁଥିଲେ ଏବଂ ତାଙ୍କୁ ବିବାହ କରିବାକୁ ଚାହୁଁଥିଲେ ।

ଗୁରୁବାର ଦିନ ପୂଜାର ପ୍ରେମିକା ସପନା ଭର୍ମା ବେଗୁସରାଇରେ ପହଞ୍ଚି ପୂଜାଙ୍କ ସହ ରହିବାକୁ ଜିଦ୍ ଧରିଥିଲେ । ଏହା ପରେ ପୂଜାଙ୍କ ସ୍ୱାମୀ ପୋଲିସ ଷ୍ଟେସନକୁ ସୂଚନା ଦେଇଥିଲେ । ସୂଚନା ପାଇବା ପରେ ନଗର ପୋଲିସ ସମସ୍ତଙ୍କୁ ଥାନାକୁ ଆଣିଥିଲା । ସପନା ଏବଂ ପୂଜା କହିଥିଲେ ଯେ ସେ ରାଞ୍ଚିର ଏକ ପୋଷାକ ଦୋକାନରେ କାମ କରୁଥିଲେ । ଯେଉଁଠାରେ ଉଭୟେ ପ୍ରେମରେ ପଡିଥିଲେ ଏବଂ ଉଭୟ ଏକାଠି ରହୁଥିଲେ । ତେବେ ଜୁନ୍ ୧୪ ରେ ପୂଜା ତାଙ୍କ ପରିବାର ସଦସ୍ୟଙ୍କ ସହ ବେଗୁସରାଇ ଆସି ବିବାହ କରିଥିଲେ।

ପୂଜା କହିଛନ୍ତି ଯେ ସେ ତାଙ୍କ ସ୍ୱାମୀଙ୍କ ସହ ରହିବାକୁ ଚାହୁଁନାହାଁନ୍ତି । ସେ ସପନାଙ୍କୁ ଭଲ ପାଆନ୍ତି ଏବଂ ସାରା ଜୀବନ ତାଙ୍କ ସହିତ ରହିବେ ଏବଂ ତାଙ୍କୁ ବିବାହ କରିବେ । ସପନା ପୂଜାଙ୍କୁ ତାଙ୍କ ପତ୍ନୀ ବୋଲି ମଧ୍ୟ ଭାବନ୍ତି ଏବଂ ଦୁହେଁ ଏକାଠି ରହିବାକୁ ଚାହାଁନ୍ତି । ପୂଜା କହିଛନ୍ତି ଯେ ପରିବାର ତାଙ୍କ ସମ୍ମତି ବିନା ତାଙ୍କୁ ବିବାହ କରିଥିଲେ, ଯେଉଁଥିପାଇଁ ସେ ଖୁସି ନଥିଲେ । ପୁରା ଘଟଣା ଜାଣିବା ପରେ ପୂଜାଙ୍କ ସ୍ୱାମୀ ତାଙ୍କୁ ବିବାହ ବନ୍ଧନରୁ ମୁକ୍ତ କରିଛନ୍ତି । ବର୍ତ୍ତମାନ ସେ ସପନାଙ୍କ ସହିତ ରହିବେ ।