ନିର୍ମାଣ ହୋଇନି ନୂଆ ବ୍ରିଜ, ପୁରୁଣାକୁ ଭାଙ୍ଗି ଦେଲା ପ୍ରଶାସନ

ଭଦ୍ରକ: ନୂଆ ବ୍ରିଜ ନିର୍ମାଣ ପାଇଁ ଭଙ୍ଗା ହେଲା ପୁରୁଣା ବ୍ରିଜ । ଭଦ୍ରକ କୁଆଁସ ସ୍ଥିତ ସାଳନ୍ଦୀ ନଦୀ ଉପରେ ଥିବା ଅର୍ଜୁନ ବ୍ରିଜକୁ ଭଙ୍ଗା ହେବାକୁ ବିତିଗଲାଣି ପ୍ରାୟ ୮ ମାସ । କିନ୍ତୁ ଏ ପର୍ଯ୍ୟନ୍ତ ଆରମ୍ଭ ହୋଇନି ନୂଆ ବ୍ରିଜ କାମ । ବ୍ରିଜ ଭାଙ୍ଗିିବାର ଆବଶ୍ୟକ ନଥାଇ ମଧ୍ୟ ରାତା ରାତି ଭଙ୍ଗା ହୋଇଥିଲା ଏହି ବ୍ରିଜ । ଯାହାକୁ ନେଇ ସ୍ଥାନୀୟ ଲୋକମାନେ ଯିବା ଆସିବା ପାଇଁ ହଇରାଣ ହରକତ ହେଉଛନ୍ତି । ଯାହା ଫଳରେ ଲୋକମାନଙ୍କ ମଧ୍ୟରେ ଦେଖା ଯାଇଛି ଅସନ୍ତୋଷ ।

ଭଦ୍ରକ ସହରକୁ ସଂଯୋଗ କରୁଥିବା ଏହି ଏକ ମାତ୍ର ବ୍ରିଜ ଉପରେ ନିର୍ଭର କରିଥାନ୍ତି ହଜାର ହଜାର ଲୋକ । ଏପରିକି ପୌରପାଳିକାର ୧୫ ନମ୍ବର ୱାର୍ଡରୁ ଆରମ୍ଭ କରି ୨୩ ନମ୍ବର ୱାର୍ଡ ପର୍ଯ୍ୟନ୍ତ ସମସ୍ତ ଅଚଂଳବାସୀ ଏହି ବ୍ରିଜ ଉପରେ ନିର୍ଭର କରିଥାନ୍ତି । ଅଧିକାରୀ ଓ ଜିଲ୍ଲା ପ୍ରଶାସନ ପାଖରେ ବାରମ୍ବାର ଅଭିଯୋଗ କରିବା ସତ୍ୱେ କୌଣସି ପ୍ରକାରରେ ମଧ୍ୟ ସ୍ଥିତି ସୁଧୁରୁ ନାହିଁ । ଏହାର କୌଣସି ସମାଧାନ ନ ବାହାରିବାରୁ ବିଜେପି ଯୁବମୋର୍ଚ୍ଚା ପକ୍ଷରୁ ଆରମ୍ଭ ହୋଇଛି ଜନମତ ସଂଗ୍ରହ । ତେବେ ଏନେଇ କୌଣସି କାର୍ଯ୍ୟନୁଷ୍ଠାନ ଗ୍ରହଣ କରାନଗଲେ ଜନ ଆନ୍ଦୋଳନ ହେବ ବୋଲି ଚେତାବନୀ ଦେଇଛି ବିଜେପି ଯୁବମୋର୍ଚ୍ଚା । ତେବେ ଦେଖିବାକୁ ବାକି ରହିଲା, ଲୋକଙ୍କ ସମସ୍ୟାକୁ ବୁଝି କେବେ ନିର୍ମାଣ ହେଉଛି ନୂଆ ବ୍ରିଜ୍ ।