ଦେଶରେ ଅସୁରକ୍ଷିତ ମହାବଳ ବାଘ, ୫୦ ଦିନରେ ୩୦ ମୃତ୍ୟୁ
୫୦ ଦିନରେ ୩୦ ମହାବଳ ବାଘଙ୍କ ମୃତ୍ୟୁ ହୋଇଛି। ଅବିଶ୍ବସନୀୟ ଲାଗୁଥିଲେ ମଧ୍ୟ ଦେଶରେ ଏଭଳି ଘଟିଛି। ୨୦୨୩ ଜାନୁଆରି ପହିଲାରୁ ଫେବ୍ରୁଆରି ୧୯ ମଧ୍ୟରେ ଏତେ ସଂଖ୍ୟକ ମହାବଳଙ୍କର ମୃତ୍ୟୁ ହୋଇଥିବା କେନ୍ଦ୍ର ସରକାରଙ୍କ ଅଧୀନ ଜାତୀୟ ବ୍ୟାଘ୍ର ସଂରକ୍ଷଣ କର୍ତୃପକ୍ଷ(ଏନ୍ଟିସିଏ) ତଥ୍ୟରୁ ଜଣାପଡ଼ିଛି। ମାତ୍ର ୱାଇଲ୍ଡ ଲାଇଫ୍ ପ୍ରୋଟେକ୍ସନ ସୋସାଇଟି ଅଫ୍ ଇଣ୍ଡିଆ(ଡବ୍ଲୁପିଏସ୍ଆଇ)ର ତଥ୍ୟ ଅଲଗା କହୁଛି। ୫୪ ଦିନରେ ୩୬ଟି ମହାବଳ ଓ ୯୯ଟି କଲରାପତରିଆଙ୍କର ମୃତ୍ୟୁ ହୋଇସାରିଛି। ଯଦି ଏହି ହାରରେ ବାଘ ମୃତ୍ୟୁ ଜାରି ରହେ; ତେବେ ବର୍ଷ ଶେଷ ବେଳକୁ ଦେଶରେ ମହାବଳଙ୍କ ସଂଖ୍ୟା ବହୁ ପରିମାଣରେ ହ୍ରାସ ପାଇବ। ସରକାରୀ ଭାବେ ବାଘଙ୍କ ମୃତ୍ୟୁ ସଂଖ୍ୟା ନେଇ ଯେଉଁ ତଥ୍ୟ ଦିଆଯାଉଛି, ବେସରକାରୀ ଭାବେ ଏହା ଢେର୍ ଅଧିକ। ଗୋଟିଏ ପଟେ ୨୦୧୮ ବାଘ ଗଣନା ରିପୋର୍ଟ ଆଧାରରେ ସଂଖ୍ୟା ବୃଦ୍ଧି ପାଇଥିବା ନେଇ କେନ୍ଦ୍ର ସରକାର ଆତ୍ମସନ୍ତୋଷ ଲାଭ କରୁଥିବା ବେଳେ ଅନ୍ୟପଟେ ୫ବର୍ଷ ମଧ୍ୟରେ ୫୦୦ରୁ ଅଧିକ ବାଘଙ୍କ ମୃତ୍ୟୁ ନେଇ ବିଶେଷଜ୍ଞମାନେ ଚିନ୍ତା ପ୍ରକଟ କରିଛନ୍ତି।
ଡବ୍ଲୁପିଏସ୍ଆଇ ତଥ୍ୟ ଅନୁସାରେ ୩୬ ମହାବଳ, ୯୯ କଲରାପତରିଆ ମରିଛନ୍ତି। ୫ବର୍ଷରେ ୫୮୧ ମହାବଳ ବାଘଙ୍କ ମୃତ୍ୟୁ ଘଟିଛି, ତେବେ କେତେ ଜନ୍ମ ହେଉଛନ୍ତି ତାହାର ହିସାବ ନାହିଁ ।
ଏନ୍ଟିସିଏ ପକ୍ଷରୁ ଆହୁରି କୁହାଯାଇଛି ଯେ ୨୦୧୨ରେ ଦେଶରେ ୮୮ଟି ମହାବଳ ବାଘଙ୍କର ମୃତ୍ୟୁ ହୋଇଥିବା ବେଳେ ଧୀରେ ଧୀରେ ସଂଖ୍ୟା ବଢ଼ିବାରେ ଲାଗିଛି। ୨୦୧୩ରେ ୬୮, ୨୦୧୪ରେ ୭୯, ୨୦୧୫ରେ ୮୨, ୨୦୧୬ରେ ୧୨୧, ୨୦୧୭ରେ ୧୧୬, ୨୦୧୮ରେ ୧୦୨, ୨୦୧୯ରେ ୯୫, ୨୦୨୦ରେ ୧୦୬, ୨୦୨୧ରେ ୧୨୭, ୨୦୨୨ରେ ୧୨୧ଟି ବାଘଙ୍କର ମୃତ୍ୟୁ ହୋଇଛି। ଅର୍ଥାତ ୨୦୧୨ରୁ ୨୦୨୨ ମଧ୍ୟରେ ଦେଶରେ ୧୧୦୫ଟି ବାଘଙ୍କର ମୃତ୍ୟୁ ହୋଇଛି। ୨୦୧୮ରୁ ଏପର୍ଯ୍ୟନ୍ତ ୫୮୧ ମହାବଳଙ୍କ ମୃତ୍ୟୁ ହୋଇଛି। ନିୟମ ଅନୁଯାୟୀ, ପ୍ରତି ୪ବର୍ଷରେ ବ୍ୟାଘ୍ର ଗଣନା ହେବା କଥା। ମାତ୍ର ଠିକ୍ ଭାବେ ଗଣନା ହେଉ ନ ଥିବାରୁ ବାଘଙ୍କ ସ୍ଥିତି ସମ୍ପର୍କରେ କୌଣସି ତଥ୍ୟ ସାମ୍ନାକୁ ଆସିପାରୁ ନାହିଁ। ୨୦୦୬ରେ ଦେଶରେ ୧୪୧୧ ଥିବା ବେଳେ ୨୦୧୦ରେ ୧୭୦୬, ୨୦୧୪ରେ ୨୨୨୬ ଓ ୨୦୧୮ ଗଣନା ବେଳେ ୨୯୬୭ଟି ମହାବଳ ଥିଲେ। ଏବେ କେତେ ମହାବଳ ଅଛନ୍ତି? ୫ବର୍ଷ ମଧ୍ୟରେ ବଢ଼ିଛନ୍ତି କି କମିଛନ୍ତି? ସେନେଇ କାହା ପାଖରେ ଖବର ନାହିଁ।