ଏଲୋପାଥି ଚିକିତ୍ସା ବିରୋଧରେ ମନ୍ତବ୍ୟ ନେଇ ରାମଦେବଙ୍କୁ ସୁପ୍ରିମକୋର୍ଟଙ୍କ ସମାଲୋଚନା

କରୋନା ମହାମାରୀ ସମୟରେ ଏଲୋପାଥି ଚିକିତ୍ସା ବିରୋଧରେ ମନ୍ତବ୍ୟ ଦେଇଥିବାରୁ ଯୋଗ ଗୁରୁ ରାମଦେବଙ୍କୁ ସୁପ୍ରିମକୋର୍ଟ ପ୍ରଶ୍ନ କରିଛନ୍ତି। ଏହି ମାମଲାରେ କେନ୍ଦ୍ର ସରକାରଙ୍କୁ ସୁପ୍ରିମକୋର୍ଟ ଏକ ନୋଟିସ ଜାରି କରିଛନ୍ତି ।

ମଙ୍ଗଳବାର ଭାରତୀୟ ମେଡିକାଲ୍ ଆସୋସିଏସନ୍ (ଆଇଏମ୍ଏ) ଦ୍ୱାରା ଦାଖଲ ହୋଇଥିବା ଏକ ପିଟିସନର ଶୁଣାଣି ସମୟରେ ପ୍ରଧାନ ବିଚାରପତି ଏନ.ଭି ରମନ୍ନା, ଜଷ୍ଟିସ୍ ହିମା କୋହଲି ଓ ସି.ଟି.ରବିକୁମାରଙ୍କ ଖଣ୍ଡପୀଠ ବାବା ରାମଦେବଙ୍କ ଉପରେ କଡ଼ା ଆଭିମୁଖ୍ୟ ଗ୍ରହଣ କରିଥିଲେ । ପ୍ରଧାନ ବିଚାରପତି ଜଷ୍ଟିସ ରମନ୍ନା ରାମଦେବଙ୍କ ଉପରେ ଅସନ୍ତୋଷ ପ୍ରକାଶ କରି କହିଥିଲେ ଯେ ସେ ଅନ୍ୟ ଚିକିତ୍ସା ବ୍ୟବସ୍ଥା ବିରୋଧରେ ଅପମାନଜନକ ମନ୍ତବ୍ୟ ଦେବାରୁ ନିବୃତ୍ତ ରୁହନ୍ତୁ ।

ସୁପ୍ରିମକୋର୍ଟ ପଚାରିଛନ୍ତି, “ବାବା ରାମଦେବ କାହିଁକି ଡାକ୍ତର, ଏଲୋପାଥି ବିରୋଧରେ ଅଭିଯୋଗ କରୁଛନ୍ତି? ସେ ଯୋଗକୁ ଲୋକପ୍ରିୟ କରିଥିଲେ। ଏହା ଭଲ କଥା। କିନ୍ତୁ ସେ ଅନ୍ୟ ଚିକିତ୍ସା ବ୍ୟବସ୍ଥାକୁ ସମାଲୋଚନା କରିବା ଠିକ୍ ନୁହେଁ। ସେ ଯେଉଁ ଚିକିତ୍ସା ପ୍ରଣାଳୀ ଅନୁସରଣ କରୁଛନ୍ତି ତାହା ଦ୍ବାରା ସବୁ ରୋଗ ଭଲ ହୋଇଯିବ ବୋଲି ଗ୍ୟାରେଣ୍ଟି କ’ଣ? ବାବା ରାମଦେବ କାହିଁକି ବ୍ୟବସ୍ଥାକୁ ବଦନାମ କରୁଛନ୍ତି?

ଆଇଏମଏ ଏହାର ଆବେଦନରେ କହିଥିଲା ଯେ କରୋନା ମହାମାରୀ ସମୟରେ ଏହାର ଟିକାକରଣ ଅଭିଯାନ ଏବଂ ଆଧୁନିକ ଔଷଧ ବିରୋଧରେ ଏକ ଅଭିଯାନ ଆରମ୍ଭ କରାଯାଇଥିଲା।

ଆଇଏମ୍ଏ ଏହି ଆବେଦନରେ କହିଛି, “ଏଲୋପାଥି ବିରୋଧରେ ଅପମାନଜନକ ମନ୍ତବ୍ୟ ଦିଆଯାଇଥିଲା ଏବଂ ଲୋକମାନଙ୍କୁ ବିଭ୍ରାନ୍ତ କରାଯାଇଥିଲା । ଆୟୁଷ କମ୍ପାନୀ ଇତ୍ୟାଦି ଦ୍ୱାରା କରାଯାଇଥିବା ବିଭ୍ରାନ୍ତିକର ବିଜ୍ଞାପନ ବିଷୟରେ ମଧ୍ୟ ସରକାର ଅବଗତ ଅଛନ୍ତି | ରାମଦେବ କହିଥିଲେ ଯେ କରୋନା ମହାମାରୀ ସମୟରେ ଏଲୋପାଥି ଚିକିତ୍ସା କରିବା ସତ୍ତ୍ଵେ ନିଜ ଜୀବନ ହରାଉଥିଲେ । ଯଦି ଏହି ପ୍ରକାରର ବୟାନବାଜି ବନ୍ଦ ନହୁଏ, ତେବେ ଏହା ଆମକୁ ଗୁରୁତର କ୍ଷତି ପହଞ୍ଚାଇବ ବୋଲି ଆଇଏମ୍ଏ ନିଜ ପିଟିସନରେ କହିଥିଲା। ”

ଆଇଏମ୍ଏର ଏହି ଯୁକ୍ତିରେ ଜଷ୍ଟିସ୍ ରବିକୁମାର ସହମତ ହୋଇଥିଲେ ଏବଂ କହିଥିଲେ ଯେ ଏଲୋପାଥିକୁ ଉପହାସ କରାଯାଉଛି ।

ଗତ ସପ୍ତାହରେ ଦିଲ୍ଲୀ ହାଇକୋର୍ଟ ମଧ୍ୟ ଏକ ପିଟିସନର ଶୁଣାଣି ସମୟରେ କହିଥିଲେ ଯେ ଏଲୋପାଥି ବିରୋଧରେ କାହାକୁ ବିଭ୍ରାନ୍ତ କରାଯିବା ଉଚିତ୍ ନୁହେଁ। ଗତ ବର୍ଷ ଆଇଏମଏ ହାଇକୋର୍ଟରେ ଏକ ପିଟିସନ ଦାୟର କରି ଅଭିଯୋଗ କରିଥିଲା ଯେ ବାବା ରାମଦେବ ନିଜ କମ୍ପାନୀ ପତଞ୍ଜଳି ଦ୍ଵାରା ପ୍ରସ୍ତୁତ ‘କରୋନିଲ’କୁ କୋଭିଡ-୧୯ ର ଚିକିତ୍ସା ପାଇଁ ଔଷଧ ବୋଲି ଦାବି କରୁଛନ୍ତି ।