ନିଖୋଜ ହେବାର ୨ ଦିନ ପରେ ଘରକୁ ଫେରିଲା ହାର୍ଦ୍ଦିକ

ଘରକୁ ଫେରିଲା ନିଖୋଜ ଶିଶୁ ହାର୍ଦ୍ଦିକ ।ଗଜପତି ଜିଲ୍ଲା କାଶୀନଗର ବ୍ଲକ୍ କୁମୁଟିସାହିରେ ନିଖୋଜ ହୋଇଥିବା ୮ ବର୍ଷର ଶିଶୁ ପୁତ୍ର ଉଦ୍ଧାର ହୋଇଛି ।ଘର ଠାରୁ ୩ କିଲୋମିଟର ଦୂର କଇଥପଦର ସ୍ଥିତ ସମ୍ପର୍କୀୟଙ୍କ ଘର ନିକଟରୁ ଶିଶୁଟିକୁ ଉଦ୍ଧାର କରାଯାଇଛି ।ସଂପର୍କୀୟ ମାନେ ଖୋଜାଖୋଜି କରୁଥିବା ବେଳେ ସନ୍ଧାନ ପାଇଥିଲେ । ଉଦ୍ଧାର ପରେ ଶିଶୁପୁତ୍ରକୁ ନେଇ ଅଧିକ ଖୋଳତାଡ କରୁଛି ପୁଲିସ ।ତେବେ ହାର୍ଦ୍ଦିକଙ୍କୁ ତାଙ୍କ ସମ୍ପର୍କୀୟଙ୍କ ଘର ନିକଟରେ କେହି ଛାଡି ଦେଇଥିବା ସୂଚନା ମିଳିଛି ।

ଗତ ୧୬ ତାରିଖ ବୁଧବାର ସନ୍ଧ୍ୟାରେ ଘର ପାଖରେ ଶିଶୁପୁତ୍ରଟି ଖେଳୁଥିବା ସମୟରେ ଦୁଇ ଜଣ ଦୁର୍ବୃତ ବାଇକରେ ଆସି ପିଲାଟିକୁ ଉଠାଇ ନେଇଥିବା ପରିବାର ଲୋକ ଅଭିଯୋଗ କରିଥିଲେ । ନିଜ ଘର ଠାରୁ ୫୦ ମିଟର ଦୂର ଏକ ବ୍ୟାକେରି ଦୋକାନ ନିକଟରେ ଖେଳୁଥିବା ବେଳେ ଶିଶୁପୁତ୍ର ନିଖୋଜ ହୋଇଯାଇଥିଲା ।ଏହା ପରଠାରୁ ହାର୍ଦ୍ଦିକଙ୍କ କୌଣସି ଖୋଜ ଖବର ମିଳିନଥିଲା ।

ସାଙ୍ଗସାଥୀଠୁ ଖବର ପାଇ କାଶୀନଗରର ବିଭିନ୍ନ ସ୍ଥାନରେ ପରିବାର ଲୋକେ ଖୋଜାଖୋଜି କରିଥିଲେ । କିନ୍ତୁ ପିଲାଟିର କୌଣସି ପତ୍ତା ମିଳିନଥିଲା । ପରେ ପରିବାର ଲୋକ ବ୍ୟସ୍ତ ହୋଇ କାଶୀନଗର ଥାନାରେ ଲିଖିତ ଭାବେ ଏତଲା ଦାଏର କରିଥିଲେ ।