ମହାବଳ ବାଘ ଆକ୍ରମଣରେ ହାତୀଛୁଆ ମୃତ

ମୟୂରଭଞ୍ଜ: ଶିମିଳିପାଳ ଅଭୟାରଣ୍ୟ ଭିତରେ ମହାବଳ ବାଘ ଆକ୍ରମଣରେ ହାତୀଛୁଆ ମୃତ। ରାଇରଙ୍ଗପୁର ବନଖଣ୍ଡ ବିଶୋଇ ରେଞ୍ଜ ଅନ୍ତର୍ଗତ ଗାର୍ଗାଡିହି ବିଟ୍ ର ଖଡିଆସାହି ନିକଟରେ ଥିବା ଟଙ୍ଗୁରୁ ସଂରକ୍ଷିତ ଜଙ୍ଗଲରେ ମୃତ ହାତୀ ଛୁଆକୁ ଠାବ କରିଛନ୍ତି ବନବିଭାଗର କର୍ମଚାରୀ । ହାତୀ ଛୁଆ ଶରୀରରେ ଥିବା କ୍ଷତ ଚିହ୍ନରୁ ମହାବଳ ବାଘ ଆକ୍ରମଣରେ ମୃତ୍ୟୁ ହୋଇଥିବା କୁହାଯାଉଛି। ଏହି ଘଟଣା ପରେ ସମ୍ପୃକ୍ତ ଅଞ୍ଚଳ ହାତୀପଲଙ୍କ କବଜାରେ ଥିଲା ।

ଆଜି ସକାଳେ ଖବର ପାଇ ରାଇରଙ୍ଗପୁର ବନଖଣ୍ଡ ଅଧିକାରୀଙ୍କ ସମେତ ବିଶୋଇ ରେଞ୍ଜର ,ବିଶୋଇ ପଶୁ ଡାକ୍ତରଖାନାର ଡାକ୍ତର, ବ୍ୟାଘ୍ର ସଂରକ୍ଷଣ ପ୍ରକଳ୍ପର ବିଶେଷଜ୍ଞ ଏବଂ ଅବୈତନିକ ବନ୍ୟପ୍ରାଣୀ ସଂରକ୍ଷକ ପ୍ରମୁଖ ଘଟଣା ସ୍ଥଳରେ ପହଞ୍ଚି ମୃତ ହାତୀ ଛୁଆର ଶଵ ବ୍ୟବଚ୍ଛେଦ କରିଥିଲେ। ବାଘ ଅଣ୍ଡିରା ହାତୀ ଛୁଆର ପଛ ପଟରୁ ଆକ୍ରମଣ କରି ତାକୁ ଆହତ କରିବା ପରେ ତା ଶୁଣ୍ଢ ଖାଇଯାଇଥିବା ଦେଖିବାକୁ ମିଳିଥିଲା। ହାତୀ ଛୁଆ କ୍ଷତ ଚିହ୍ନରେ ମହାବଳ ବାଘର ପାଦ ଚିହ୍ନକୁ ଦେଖି ବିଶେଷଜ୍ଞ ଡାକ୍ତର ଏହି ମୃତ୍ୟୁର କାରଣ ସ୍ପଷ୍ଟ କରିଥିଲେ। ଶଵ ବ୍ୟବଛେଦ ପରେ ମୃତ ହାତୀ ଛୁଆକୁ ଜଙ୍ଗଲରେ ପୋତି ଦିଆଯାଇଥିଲା।