ମାନସ ସ୍ଵାଇଁ ହତ୍ୟା ମାମଲା : ମୁଖ୍ୟ ଅଭିଯୁକ୍ତ ଶର୍ମିଷ୍ଠାଙ୍କ କାର୍ ଜବତ
ବହୁ ଚର୍ଚ୍ଚିତ କ୍ୟାମେରାମ୍ୟାନ୍ ମାନସ ସ୍ଵାଇଁ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ୱେବ୍ ପୋର୍ଟାଲର ମାଲିକାଣୀ ଶର୍ମିଷ୍ଠା ରାଉତଙ୍କ କାର୍ ଭୁବନେଶ୍ଵରରୁ ଜବତ। ଏୟାରଫିଲ୍ଡ ଥାନା ଅଞ୍ଚଳରେ ଥିବା ଶର୍ମିଷ୍ଠାଙ୍କ ଅଫିସ ପାର୍କିଂରୁ ଏହି କାର୍କୁ ଠାବ କରିଛି ପୋଲିସ । ହେଲେ ଏବେବି ଫେରାର୍ ଅଛନ୍ତି ଶର୍ମିଷ୍ଠା। ମାନସଙ୍କ ଅପହରଣରେ ଏହି କାର୍ ବ୍ୟବହାର କରାଯାଇଥିବା ସନ୍ଦେହ କରାଯାଉଛି।
ପ୍ରକାଶ ଥାଉକି, କ୍ୟାମେରାମ୍ୟାନ୍ ମାନସ ସ୍ୱାଇଁ ହତ୍ୟା ମାମଲାରେ ସୋମବାର ଦିନ ସୂଚନା ଓ ଲୋକସଂପର୍କ ବିଭାଗର ପୂର୍ବତନ ନିର୍ଦ୍ଦେଶକ ନିରଞ୍ଜନ ସେଠୀଙ୍କୁ ଗିରଫ କରିଥିଲା ପୋଲିସ । ହେଲେ ଏବେ ଯାଏଁ ମୁଖ୍ୟ ଅଭିଯୁକ୍ତ ଶର୍ମିଷ୍ଠାଙ୍କର କୌଣସି ପତ୍ତା ମିଳୁନାହିଁ । ପୋଲିସ ସ୍ୱତନ୍ତ୍ର ଟିମ୍ ଗଠନ କରି ବିଭିନ୍ନ ସ୍ଥାନରେ ରେଡ୍ କରୁଛି । ସେପଟେ ନିରଞ୍ଜନ ଓ ଶର୍ମିଷ୍ଠାଙ୍କ ସଂପର୍କରେ ବହୁ ଖିଅ ବାହାରିଛି । ଶର୍ମିଷ୍ଠା ଓ ନିରଞ୍ଜନ ବାରମ୍ବାର ଫୋନ୍ରେ କଥା ହେଉଥିଲେ । ଏପରିକି ଶର୍ମିଷ୍ଠା ଫେରାର ହେବା ଦିନ ତାଙ୍କୁ ନିରଞ୍ଜନ ୩୦ଥରରୁ ଅଧିକ ଫୋନ୍ କରିଥିବା ଜଣାପଡିଛି ।