ସୁନ୍ଦରଗଡ଼ ଫେରିଲେ ବିରଜୁ କୁଲୁ

ସୁନ୍ଦରଗଡ଼ : ସୁନ୍ଦରଗଡ଼ ଫେରିଲେ ନିଖୋଜ ବିରଜୁ କୁଲୁ । ବିରଜୁଙ୍କୁ ତାଳଚେରରୁ ଉଦ୍ଧାର କରାଯାଇ କୁତ୍ରା ଥାନାରେ ରଖାଯାଇଛି । ମଙ୍ଗଳବାର ଦିନ ସୁନ୍ଦରଗଡ଼ରୁ ଏକ ପୋଲିସ ଟିମ୍ ତାଳଚେର ଯାଇ ବିରଜୁ କୁଲୁଙ୍କୁ ଆଣି ବୁଧବାର କୁତ୍ରାରେ ପହଞ୍ଚିଛି ।

ସୂଚନାନୁଯାୟୀ , ବିରଜୁ କୁଲୁ ରବିବାର ଦିନ ପୁଣି ନିଖୋଜ ହୋଇଯାଇଥିଲେ । ରବିବାର ରାତି ୧ଟାରେ ସେ କୁଆଡ଼େ ଚାଲିଯାଇଥିବା ପରିବାର ଲୋକେ କହିଥିଲେ । ବିରଜୁ କୁଲୁ ନିଖୋଜ ହେବା ପରେ ତାଙ୍କ ଭଉଣୀ ଥାନାରେ ଏତଲା ଦେଇଥିଲେ ।

ଦୀର୍ଘ ୨୦ ବର୍ଷ ଧରି ପାକିସ୍ତାନ ଜେଲରେ ଦିନ କାଟିଥିବା ବିରଜୁ ପ୍ରଶାସନର ଉଦ୍ୟମରେ ଜନ୍ମମାଟିକୁ ଫେରିଥିଲେ। ଅକ୍ଟୋବର ୨୬ ତାରିଖରେ ପାକିସ୍ତାନ ଜେଲରୁ ସେ ମୁକୁଳିଥିଲେ । ସ୍ଥାନୀୟ ପ୍ରଶାସନ ଓ ରାଜ୍ୟ ସରକାରଙ୍କ ସହଯୋଗରେ ନଭେମ୍ବର ୧୩ ତାରିଖରେ ବିରଜୁ ସୁନ୍ଦରଗଡ଼ ଜିଲ୍ଲା କୁତ୍ରା ଥାନା ଅଧିନ ଜଙ୍ଗରପଡା ଗାଁରେ ଆସି ପହଁଚି ଥିଲେ । ଗାଁକୁ ଫେରିବା ପରେ ସ୍ଥାନୀୟ ପ୍ରଶାସନ ତାଙ୍କୁ ସମସ୍ତ ପ୍ରକାର ସହାୟତା ଯୋଗାଇ ଦେବ ବୋଲି ପ୍ରତିଶ୍ରୁତି ଦେଇଥିଲା । କିନ୍ତୁ ଏତେ ସବୁ ପରେ ମଧ୍ୟ ବିରଜୁ କୁଲୁ ପୁଣି ନିଖୋଜ ହୋଇଯାଇଥିଲେ । ତେବେ ନିଖୋଜର ୨ ଦିନ ପରେ ବିରଜୁଙ୍କୁ ଉଦ୍ଧାର କରାଯାଇଛି ।