ମରିଚି କୁଣ୍ଡ ଜଳ ନିଲାମ, ପ୍ରଥମ ଗରାକୁ ୨୧ ହଜାରରେ ନେଲେ କଟକର ଦମ୍ପତି

ନିଲାମ ହୋଇଛି ମରିଚି କୁଣ୍ଡର ପବିତ୍ର ଜଳ । ପ୍ରଥମ ଗରା ପାଣିକୁ ୨୧ ହଜାରରେ ନିଲାମ ହୋଇଛି ।ଯାହାକୁ କିଣିଛନ୍ତି କଟକ ଦାମୋଦରପୁରର ଜିତେନ୍ଦ୍ର ମହାରଣା ଓ ଜ୍ୟୋସ୍ନା ମହାରଣା । ପ୍ରଥମ ଗରା ପାଇଁ ସରକାରୀ ନିଲାମ ଡ଼ାକ ଥିଲା ୨୦, ୧୦୦ ଟଙ୍କା । 

ପ୍ରତିବର୍ଷ ପରି ଚଳିତ ବର୍ଷ ମଧ୍ୟ ଅନୁଷ୍ଠିତ ହୋଇଛି ମରିଚି କୁଣ୍ଡ ପାଣି ନିଲାମ । ଏହି ଜଳକୁ ଗ୍ରହଣ କରି ସ୍ନାନ କଲେ ସନ୍ତାନ ପ୍ରାପ୍ତି ହୋଇଥାଏ ବୋଲି ଆବାହନ କାଳରୁ ଲୋକଙ୍କ ମନରେ ବିଶ୍ୱାସ ରହିଛି । ଲିଙ୍ଗରାଜଙ୍କ ରୁକୁଣା ରଥ ଯାତ୍ରା ପୂର୍ବ ରାତିରେ ମରିଚି କୁଣ୍ଡରୁ ଜଳ ନିଆଯାଇ ମହାପ୍ରଭୁଙ୍କ ରଥ ପ୍ରତିଷ୍ଠା କରାଯାଏ । ଏହାପରେ ଆରମ୍ଭ ହୋଇଥାଏ ମରିଚି କୁଣ୍ଡ ଜଳର ନିଲାମ ପ୍ରକ୍ରିୟା । ଲିଙ୍ଗରାଜ ସେବାୟତ ସଂଘ ବଡ଼ୁ ନିଯୋଗ ପକ୍ଷରୁ ପ୍ରତିବର୍ଷ ଏହି ନିଲାମ ପ୍ରକ୍ରିୟାର ଆୟୋଜନ କରାଯାଇଥାଏ । ନିଲାମ ଜଳକୁ ଗ୍ରହଣ କରିବା ପାଇଁ ନିଷ୍ଠାର ସହ ବହୁ ପରିବାର ଅପେକ୍ଷା କରିଥିବା ବେଳେ ରାତି ୧୨ଟାରୁ ଆରମ୍ଭ ହୁଏ ଏହି ପ୍ରକ୍ରିୟା । ନିଲାମ ଅନୁସାରେ ତିନୋଟି ଡ଼ାକ ହୋଇଥିଲା । ଯେଉଁଥିରେ ପ୍ରଥମ ଘଡ଼ା ପାଣି ନିଲାମ ପାଇଁ ସରକାରୀ ଡ଼ାକ ୨୦,୧୦୦ ଟଙ୍କା ରଖାଯାଇଥିଲା ।ଯାହାକୁ ୨୧ ହଜାରରେ କିଣିଛନ୍ତି କଟକ ଦାମୋଦରପୁରର ଜିତେନ୍ଦ୍ର ମହାରଣା ଓ ଜ୍ୟୋତ୍ସ୍ନା ମହାରଣା। ଏହାପରେ ୨ୟ ଗରା ଓ ୩ୟ ଗରା ପାଣି ନିଲାମ ଶେଷ ହୋଇଥିଲା । ଆଉ ବାକି ଗରା ଜଳକୁ ଅବଶିଷ୍ଠ ଅପେକ୍ଷାରତ ଦମ୍ପତିଙ୍କୁ ସର୍ବନିମ୍ନ ଦରରେ ଦିଆଯାଇଥିଲା ।