ଦେବାଶିଷ ଙ୍କ ବଡ ବିସ୍ପୋରଣ
ୱାକଫ୍ ସଂଶୋଧନ ବିଲ୍ ସମର୍ଥନ ପ୍ରସଙ୍ଗରେ ଜଣଙ୍କ ପରେ ଜଣେ ବିଜେଡି ନେତା ବିସ୍ଫୋରକ ବୟାନ ଦେବାରେ ଲାଗିଛନ୍ତି । ବିଜେଡି ସାଂସଦ ଦେବାଶିଷ ସାମନ୍ତରାୟ ଏନେଇ ମୁହଁ ଖୋଲିଛନ୍ତି । ସେ କହିଛନ୍ତି, ମୁଁ ବୁଝିପାରିଲିନି ସଂସଦରେ କଣ ହେଲା । ସେଥିପାଇଁ ମୁଁ ଭୋଟ ଦେଲିନି । ବିଲ୍କୁ ବିରୋଧ ପାଇଁ ନବୀନ କହିଥିଲେ । ଶଙ୍ଖ ଭବନରେ ଏନେଇ ଆଲୋଚନା ବି ହୋଇଥିଲା । ମୁନ୍ନା ଖାନ୍ଙ୍କ ଉପସ୍ଥିତିରେ ଆଲୋଚନା ହୋଇଥିଲା । ହଠାତ କିଏ ନିଷ୍ପତ୍ତି ବଦଳାଇଲା ଜାଣିନି ।
ସଂଧ୍ୟା ସାଢ଼େ ୬ଟାରେ ସସ୍ମିତଙ୍କ ଏକ୍ସ ପୋଷ୍ଟରୁ ଜାଣିଲି । ଦଳର ହ୍ୱିପ୍ ନାହିଁ ବୋଲି ଏକ୍ସରୁ ଜାଣିଲି । ମୁଁ କାହା ସହ କଥା ହୋଇପାରିନି । ସବୁ ନେତା ମତେ ଫୋନ୍ କରିଛନ୍ତି । କିନ୍ତୁ ମୁଁ କାହା ସହ କଥା ହୋଇନି । ସଂସଦ ଭବନରେ ଫୋନ୍ରେ କଥା ହୋଇପାରେନା ଏବଂ ଏନେଇ କିଏ ପରାମର୍ଶ ଦେଲା କହିପାରିବିନି । ନବୀନଙ୍କ ଉପରେ ପରାମର୍ଶଦାତା ଥିଲେ ଜାଣିନି । ମୁଖ୍ୟ ପରାମର୍ଶଦାତାଙ୍କ ନିର୍ଦ୍ଦେଶରେ ପରିବର୍ତ୍ତନ ହୋଇଛି । ତେବେ କିଏ ସେ ମୁଖ୍ୟ ପରାମର୍ଶଦାତା, ନାଁ କହିଲେନି ଦେବାଶିଷ । ଉତ୍ତର ନବୀନ ପଟ୍ଟନାୟକ ହିଁ ରଖିବେ ବୋଲି ସେ କହିଛନ୍ତି ।
ସେପଟେ ବିଜୁ ଜନତା ଦଳ ଭିତରେ ଦ୍ୱନ୍ଦ୍ୱ ହିଁ ଦ୍ୱନ୍ଦ୍ୱ । ସୋସିଆଲ୍ ମିଡିଆ ଏକ୍ସରେ ସସ୍ମିତ ପାତ୍ରଙ୍କ ଦଳ ବିରୋଧୀ ଆଭିମୁଖ୍ୟ ନେଇ ବିଜେଡିରେ ଆରମ୍ଭ ହୋଇଯାଇଛି ବିବାଦ । ପ୍ରଫୁଲ୍ଲଙ୍କ ପରେ ଦଳର ସୁପ୍ରିମୋଙ୍କୁ ଚିଠି ଲେଖିଲେ ପ୍ରତାପ ଜେନା । ସେ କହିଛନ୍ତି, ସସ୍ମିତଙ୍କ ଏକ୍ସ ପୋଷ୍ଟ ଦଳର ଆଭିମୁଖ୍ୟ ବିରୋଧୀ । ଷଡଯନ୍ତ୍ର ପଛରେ କିଏ, ଅନୁଧ୍ୟାନ କରିବାର ଆବଶ୍ୟକ ରହିଛି ।
ବିଜେଡି ବିଧାୟକ ଗଣେଶ୍ୱର ବେହେରା ମଧ୍ୟ କହିଛନ୍ତି, କାଲି ଘଟଣା ବିଜେଡି ପାଇଁ ଅପ୍ରୀତିକର ପରିସ୍ଥିତି ସୃଷ୍ଟି କରିଛି । ନିଜେ ସସ୍ମିତ ପାତ୍ର କହିଥିଲେ ଆମେ ୱାକଫ୍ ବିଲକୁ ବିରୋଧ କରିବୁ । କିନ୍ତୁ ୪୮ ଘଣ୍ଟା ନ ପୂରୁଣୁ ବିବେକ ଆଧାର କେମିତି ହୋଇଗଲା । ଆମର ସନ୍ଦେହ ଏହା ତାଙ୍କର ବ୍ୟକ୍ତିଗତ ନିଷ୍ପତ୍ତି । ସେଥିପାଇଁ ସେ କ୍ଷମା ମାଗନ୍ତୁ ।