ଚଳଚଞ୍ଚଳ ଏକାମ୍ର କ୍ଷେତ୍ର; ଆଜି ଗଡ଼ିବ ପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥ
ଆଜି ପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥଯାତ୍ରା । ଅଶୋକାଷ୍ଟମୀ ପାଇଁ ଚଳଚଞ୍ଚଳ ଏକାମ୍ରକ୍ଷେତ୍ର । ସକାଳର ନୀତିକାନ୍ତି ସରିବା ପରେ ମଧ୍ୟାହ୍ନ ୧୨ଟାରୁ ୧୨ଟା ୩୦ ମଧ୍ୟରେ ଯାତ୍ରାପୂଜା ହେବାର ବିଧି ରହିଛି । ସେହିଭଳି ଶ୍ରୀଜିଉଙ୍କ ପହଣ୍ଡି ଓ ରଥାରୁଢ଼ ସମୟ ଅପରାହ୍ନ ୧୨ଟା ୩୦ରୁ ଅପରାହ୍ନ ଗୋଟାଏ ୩୦ ଯାଏ ରହିଛି ।
ଏହାପରେ ଗୋଟାଏ ୩୦ ମିନିଟ୍ରୁ ୩ଟା ୩୦ ମିନିଟ୍ ମଧ୍ୟରେ ରଥରେ ପୂଜା ହେବ । ୩ଟା ୩୦ ମିନିଟ୍ରୁ ରଥଟଣା ଆରମ୍ଭ ହେବ ବୋଲି ନୀତି ନିର୍ଘଣ୍ଟ ହୋଇଛି । ସଂଧ୍ୟା ସାଢ଼େ ୭ଟାରେ ରାମେଶ୍ବର ମନ୍ଦିରକୁ ବିଜେ କରିବେ ଶ୍ରୀଜିଉ । ସାଢେ ୭ଟାରୁ ଶ୍ରୀଜିଉଙ୍କ ଅନ୍ୟାନ ରୀତିନୀତି ଆରମ୍ଭ ହେବ ।
ଅନ୍ୟପଟେ ଯାତ୍ରାକୁ ଶୃଙ୍ଖଳତି କରିବା ପାଇଁ କମିଶନରେଟ ପୁଲିସ ପକ୍ଷରୁ ସମସ୍ତ ବ୍ୟବସ୍ଥାର ଯାଞ୍ଚ କରାଯିବା ସହ କଡ଼ା ସୁରକ୍ଷା ବ୍ୟବସ୍ଥାକୁ ଧ୍ୟାନ ଦିଆଯାଇଛି । ରଥ ଯାତ୍ରାରେ ୧୬ ପ୍ଲାଟୁନ ପୁଲିସ ଫୋର୍ସ ସହିତ ସାଦା ପୋଷାକରେ ନିୟୋଜିତ ହେବେ ପୋଲିସ କର୍ମଚାରୀ ।
ଷ୍ଟ୍ରାଇକିଂ ଫୋର୍ସ ସହିତ ୨ ଡିସିପି ରାଙ୍କ ଅଧିକାରୀ, ୩ ଆଡିସିନାଲ ଡିସିପି ରାଙ୍କ ଅଧିକାରୀ, ୫ ଏସିପି ରାଙ୍କ ଅଧିକାରୀ, ୧୨ ଇନ୍ସପେକ୍ଟର, ୬୫ ଏସଆଇ ଓ ଏଏସଆଇ ସୁରକ୍ଷା ଦାୟିତ୍ବରେ ନିୟୋଜିତ ହେବେ । ଏଥିସହିତ ଯାନବାହନ ନିୟନ୍ତ୍ରଣ ଏବଂ ଟ୍ରାଫିକ୍ ବ୍ୟବସ୍ଥା ପାଇଁ ଅଧିକ ଟ୍ରାଫିକ୍ ପୁଲିସ ମଧ୍ୟ ରହିବେ ।
ରଥ ଚଳନକୁ ଦୃଷ୍ଟିରେ ରଖି ୨ଶହରୁ ୩ ଶହ ମିଟର ପର୍ଯ୍ୟନ୍ତ ରାସ୍ତା ଖାଲି କରାଯିବା ସହ ପାର୍କିଂ ବ୍ୟବସ୍ଥା କରାଯିବ ବୋଲି ସୂଚନା ଦେଇଛନ୍ତି ଭୁବନେଶ୍ବର ଡିସିପି ।