ଆରମ୍ଭ ହେବ ‘ପୁଷ୍ପା ୨’ର ଶୁଟିଂ
ବହୁପ୍ରତୀକ୍ଷିତ ସିକ୍ୱେଲ୍ ‘ପୁଷ୍ପା: ଦ ରୁଲ୍’ର ସୁଟିଂ ଆରମ୍ଭ ହୋଇଛି । ସୋସିଆଲ ମିଡିଆରେ ଫିଲ୍ମର ପୂଜା ଉତ୍ସବର ଫଟୋ ଓ ଭିଡିଓ ଭାଇରାଲ ହେଉଛି ।
ଫିଲ୍ମର ଫିମେଲ୍ ଲିଡ୍ ରଶ୍ମିକା ମନ୍ଦନା ସୋସିଆଲ ମିଡିଆରେ ଏହାର ପୂଜା ଉତ୍ସବର ଏକ ଫଟୋ ଶେୟାର କରିଛନ୍ତି । ଠାକୁରଙ୍କ ଫଟୋ ସାମ୍ନାରେ ଫିଲ୍ମର କ୍ଲାପ୍ ବୋର୍ଡ ନଜର ଆସୁଛି । ସେଥିରେ ସୋମବାର ଅର୍ଥାତ ଅଗଷ୍ଟ ୨୨ ତାରିଖ ଉଲ୍ଲେଖ ହୋଇଛି । ଫଟୋ ସହିତ ରଶ୍ମିକା କ୍ୟାପ୍ସନ ଲେଖିଛନ୍ତି ‘ଲେଟ୍ସ ଗୋ’ । ଏହା ପରେ ଫ୍ୟାନ୍ଙ୍କ ଉତ୍ସାହ ଆହୁରି ବଢ଼ିଯାଇଛି । ସିକ୍ୱେଲ୍ରେ ଅଲ୍ଲୁ ଅର୍ଜୁନ ଓ ରଶ୍ମିକା ମନ୍ଦନାଙ୍କ ସହିତ ଫହାଦ ଫସିଲ ପୁଣି ଥରେ ସ୍କ୍ରିନ୍ ଶେୟାର କରିବେ । ଏଥିରେ ମଧ୍ୟ ସେ ନେଗେଟିଭ୍ ଭୂମିକା ନିର୍ବାହ କରିବେ ।
ନିର୍ମାତା ସୋସିଆଲ ମିଡିଆରେ ଫିଲ୍ମର ପୂଜା ମହୋତ୍ସବର ଫଟୋ ସହିତ ଉଲ୍ଲେଖ କରିଛନ୍ତି ‘ଫେରିଲା ପୁଷ୍ପରାଜ୍! ଏଥର ଶାସନ କରିବାକୁ ।’ ଫିଲ୍ମକୁ ଭାରତର ସର୍ବାଧିକ ପ୍ରତୀକ୍ଷିତ ସିକ୍ୱେଲ୍ ବୋଲି ମଧ୍ୟ ସେମାନେ ଉଲ୍ଲେଖ କରିଛନ୍ତି । ସୁକୁମାରଙ୍କ ନିର୍ଦ୍ଦେଶନାରେ ନିର୍ମିତ ‘ପୁଷ୍ପା: ଦ ରାଇଜ୍’ ବିଶ୍ୱସ୍ତରରେ ୩୦୦ କୋଟିରୁ ଅଧିକ ଆୟ କରିଥିଲା । ମୂଳ ତେଲୁଗୁ ଭାଷାରେ ନିର୍ମିତ ଏହି ଫିଲ୍ମ ହିନ୍ଦୀ, ତାମିଲ, ମାଲାୟାଲମ୍ ଓ କନ୍ନଡ଼ ଭାଷାରେ ରିଲିଜ୍ ହୋଇଥିଲା । ତେବେ ସିକ୍ୱେଲ୍ ‘ପୁଷ୍ପା: ଦ ରୁଲ୍’ର ରିଲିଜ୍ ତାରିଖ ଏବେ ସୁଦ୍ଧା ଘୋଷଣା ହୋଇନାହିଁ । ଏଥର ବି ରଶ୍ମିକାଙ୍କୁ ପୁଷ୍ପାର ଲିଡ୍ ଲେଡି ଶ୍ରୀବଲ୍ଲି ଭୂମିକାରେ ଦେଖିବାକୁ ପାଇବେ ଦର୍ଶକ ।