ବକ୍ସ ଅଫିସରେ ସବୁ ରେକର୍ଡ ଭାଙ୍ଗୁଛି ପଠାନ୍, ୧୯ ଦିନ ରେ ଗ୍ରସ୍ ଭାଲ୍ୟୁ ୯୦୦ କୋଟିରୁ ଅଧିକ
କିଙ୍ଗ୍ ଖାନଙ୍କ ବହୁ ପ୍ରତୀକ୍ଷିତ ଚଳଚ୍ଚିତ୍ର ‘ପଠାନ୍’କୁ ରିଲିଜ୍ ହେବାର ୧୯ ଦିନ ହୋଇଗଲାଣି। ହେଲେ ବି ଫିଲ୍ମଟି ବକ୍ସ ଅଫିସରେ ଧମାକା କରି ଚାଲିଛି । ଫ୍ୟାନ୍ସମାନଙ୍କ ମଧ୍ୟରେ ଏହାର କ୍ରେଜ ଏବେବି ସରିନି । ବିଶ୍ବ ସ୍ତରରେ ସିନେମାଟି ୯୦୦ କୋଟି ଟଙ୍କା ଆୟ କରି ସାରିଥିବା ବେଳେ ଭାରତରେ ଏହା ୫୦୦ କୋଟି ଟଙ୍କାର ବେପାର ପାର୍ କରି ସାରିଲାଣି। ଫିଲ୍ମଟିର ୧୯ ଦିନର ରୋଜଗାର ରିପୋର୍ଟ ଏବେ ସାମ୍ନାକୁ ଆସିଛି। ତୃତୀୟ ସପ୍ତାହାନ୍ତରେ କିଙ୍ଗ୍ ଖାନ୍ଙ୍କ ଏହି ଫିଲ୍ମ ୧୨.୫୦ କୋଟି ଟଙ୍କାର ବେପାର କରିଛି। ଏହା ହେଉଛି କେବଳ ହିନ୍ଦୀ ଭର୍ସନର ରବିବାର ରିପୋର୍ଟ। ତେବେ ଫିଲ୍ମଟି ସମୁଦାୟ ୫୮୨ କୋଟିରୁ ଅଧିକ ରୋଜଗାର କରି ସାରିଲାଣି।
ପଠାନ ବିଶ୍ବ ସ୍ତରରେ ୯୦୦ କୋଟିରୁ ଅଧିକ ବେପାର କରି ସାରିଥିବା ବେଳେ କେବଳ ହିନ୍ଦୀ ଭାଷାରେ ୪୭୫ କୋଟି ଟଙ୍କା ରୋଜଗାର କରି ସାରିଲେଣି। ଅନ୍ୟ ସମସ୍ତ ଭାଷାରେ ୪୯୨ କୋଟ ଟଙ୍କା ରୋଜଗାର କରି ସାରିଲାଣି ଶାହାରୁଖ୍ଙ୍କ ଏହି ଫିଲ୍ମ।
ଏଣେ ‘ପଠାନ’ର ଚାହିଦା କମିବାର ନାଁ ଧରୁନି। ସୁପର୍ଷ୍ଟାର୍ ଶାହାରୁଖ୍ ଖାନ୍ଙ୍କ ଏହି ଫିଲ୍ମ ରେକର୍ଡ ପରେ ରେକର୍ଡ ସୃଷ୍ଟି କରି ଚାଲିଛି। ସିନେମାଟି ଦୁଇ ସପ୍ତାହ ପାର୍ କରିସାରିଥିବା ବେଳେ ଏହା କେବଳ ଦେଶରେ ନୁହେଁ, ବିଦେଶରେ ବି ଧମାକା କରିଛି। ଫିଲ୍ମଟି ରିଲିଜ୍ ହେବାର ୩ ସପ୍ତାହ ପରେ ବି ପ୍ରଶଂସକ ଏହାକୁ ଭଲପାଇବା ଦେଇ ଚାଲିଛନ୍ତି।
‘ପଠାନ’ର ଚାହିଦା କେବଳ ଭାରତ ନୁହେଁ, ବରଂ ଦୁନିଆ ସାରା ରହିଛି। ଭାରତୀୟ ବକ୍ସ ଅଫିସ ପରି ବିଦେଶରେ ବି ଫିଲ୍ମଟି ଦର୍ଶକଙ୍କ ମନ ମୋହିଛି । ତେବେ ଫିଲ୍ମକୁ ମିଳୁଥିବା ଭଲପାଇବାକୁ ଦେଖି ନିର୍ଦ୍ଦେଶକ ସିଦ୍ଧାର୍ଥ ଆନନ୍ଦ ‘ପଠାନ-୨’ ନିର୍ମାଣ ନେଇ ଘୋଷଣା କରିଛନ୍ତି।