କଳା ଦେଶ ଠାରୁ ବଡ ନୁହେଁ-ରଣବୀର କପୂର

୨୦୨୨ରେ ସୁଯୋଗ ମିଳିଲେ ଓ ଭଲ କାହାଣୀ ମିଳିଲେ ମୁଁ ପାକିସ୍ତାନୀ ଫିଲ୍ମ କରିବି ବୋଲି କହିଥିଲେ ବଲିଉଡ ଅଭିନେତା ରଣବୀର କପୁର। ଏହି ବିବୃତି ପାଇଁ ସୋସିଆଲ ମିଡିଆରେ ତାଙ୍କୁ ଟାର୍ଗେଟ କରାଯାଇଥିଲା। ଡିସେମ୍ବର ୨୦୨୨ରେ ରେଡ ସି’ ଫେଷ୍ଟିଭାଲରେ ରଣବୀର ଏହି ବିବୃତି ଦେଇଥିବା ବେଳେ ଏବେ ସେ ଏହା ଉପରେ ନିଜର ସ୍ପଷ୍ଟୀକରଣ ଦେଇଛନ୍ତି।

ନିଜର ଆଗାମୀ ଫିଲ୍ମ ‘ତୁ ଝୁଠି ମେଁ ମକ୍କାର’ ଫିଲ୍ମୀ ପ୍ରଚାର ସମୟରେ ରଣବୀର କହିଛନ୍ତି ଯେ, ମୁଁ ଦେଇଥିବା ବିବୃତିକୁ ଭୁଲ ବୁଝାଯାଇଛି। ମୁଁ ଏକ ଫିଲ୍ମ ଇଭେଣ୍ଟକୁ ଯାଇଥିଲି ଏବଂ ଅନେକ ପାକିସ୍ତାନୀ ଚଳଚ୍ଚିତ୍ର ନିର୍ମାତା ମୋତେ ପ୍ରଶ୍ନ କରିଥିଲେ ‘ଯଦି ଆପଣଙ୍କୁ ଭଲ କାହାଣୀ ମିଳେ, ତେବେ ଆପଣ ଫିଲ୍ମ କରିବେ ନାଁ ନାହିଁ?’ ମୁଁ କୌଣସି ପ୍ରକାର ବିବାଦୀୟ ମନ୍ତବ୍ୟ ଦେବାକୁ ଚାହୁଁନଥିଲି। ସେଥିପାଇଁ ମୁଁ ଭଲ କାହାଣୀ ମିଳିଲେ ଫିଲ୍ମ କରିବି ବୋଲି କହିଥିଲି। ଆମକୁ କଳାର ସମ୍ମାନ କରିବା ଉଚିତ୍। କିନ୍ତୁ କଳା ଦେଶଠାରୁ ବଡ଼ ନୁହେଁ। ସେଥିପାଇଁ ଯେଉଁ ଦେଶ ସହିତ ଆମ ଦେଶର ଭଲ ସମ୍ପର୍କ ନାହିଁ, ସେ ଦେଶର ଫିଲ୍ମ ବି ମୁଁ କରିବି ନାହିଁ। ମୋର ପ୍ରଥମ ପ୍ରାଥମିକତା ସର୍ବଦା ମୋ ଦେଶ ହେବ।

ରଣବୀର କପୁରଙ୍କୁ ଶେଷ ଥର ପାଇଁ ନିର୍ଦ୍ଦେଶକ ଅୟାନ ମୁଖାର୍ଜୀଙ୍କ ଫିଲ୍ମ ‘ବ୍ରହ୍ମାସ୍ତ୍ର’ରେ ଦେଖିବାକୁ ମିଳିଥିଲା। ଏବେ ତାଙ୍କୁ ନିର୍ଦ୍ଦେଶକ ଲଭ୍ ରଂଜନଙ୍କ ଫିଲ୍ମ ‘ତୁ ଝୁଟି ମେଁ ମକ୍କାର’ରେ ଦେଖିବାକୁ ମିଳିବ। ଏହି ଚଳଚ୍ଚିତ୍ରରେ ତାଙ୍କ ସହ ନଜର ଆସିବେ ଶ୍ରଦ୍ଧା କପୁର। ଏହି ଚଳଚ୍ଚିତ୍ରଟି ମାର୍ଚ୍ଚ ୮ରେ ପ୍ରେକ୍ଷାଳୟରେ ମୁକ୍ତିଲାଭ କରିବ।