ବଜେଟ ପରେ ବସିଲା ନବୀନ ନିବାସରେ ବିଜେଡି ବୈଠକ
ବିଧାନସଭାରେ ବଜେଟ୍ ଉପସ୍ଥାପନ ହେଲା ପରେ ବିଜେଡିର ସବୁ ମନ୍ତ୍ରୀ ଓ ବିଧାୟକଙ୍କୁ ନବୀନ ନିବାସ ଡକାଯାଇଥିଲା। ସନ୍ଧ୍ୟା ପ୍ରାୟ ୭ଟା ସୁଦ୍ଧା ୧୦୦ରୁ ଅଧିକ ବିଧାୟକ ପହଞ୍ଚିଯାଇଥିଲେ। ୭ଟାରେ ବୈଠକ ଆରମ୍ଭ ହୋଇଥିଲା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବଜେଟ୍ର ଲୋକାଭିମୁଖୀ ଦିଗ ସମ୍ପର୍କରେ ବିଧାୟକମାନଙ୍କୁ ବୁଝାଇଥିଲେ। ନିର୍ଦ୍ଦିଷ୍ଟ ଭାବେ କେଉଁ କେଉଁ ଯୋଜନା ଦ୍ବାରା ସାଧାରଣ ଜନତା ସିଧାସଳଖ ସୁଫଳ ପାଇବେ, ସେ ସମ୍ପର୍କରେ ଆଲୋଚନା ହୋଇଥିଲା। ଆସନ୍ତା ବର୍ଷ ସାଧାରଣ ନିର୍ବାଚନ ଥିବାରୁ ଏହା ଶେଷ ପୂର୍ଣ୍ଣାଙ୍ଗ ବଜେଟ୍। ତେଣୁ ଏହି ଲୋକାଭିମୁଖୀ ବଜେଟ୍ ସମ୍ପର୍କରେ ଯେମିତି ତୃଣମୂଳ ସ୍ତରରେ ଲୋକମାନେ ଜାଣିପାରିବେ, ସେଥି ପାଇଁ ବିଧାୟକମାନେ ଦାୟିତ୍ବ ନେବେ। ବ୍ଲକ୍ ସ୍ତରରେ ବିଭିନ୍ନ କାର୍ଯ୍ୟକ୍ରମ କରି ଲୋକଙ୍କୁ ବଜେଟ୍ ସମ୍ପର୍କରେ ବୁଝାଯିବ। ଖୁବ୍ ଶୀଘ୍ର ଏହାର ବ୍ଲୁ ପ୍ରିଣ୍ଟ୍ ପ୍ରସ୍ତୁତ ହେବ ବୋଲି ସୂଚନା ଦିଆଯାଇଥିଲା।