ଗ୍ରାମ ସଭାପତି ଚୟନକୁ ନେଇ ତିଗିରିଆ ଥାନା ବନମାଳୀପୁର ଗାଁରେ ବୋମା ମାଡ଼: 2 ଜଣ ଆହତ

ଗ୍ରାମ ସଭାପତି ଚୟନକୁ ନେଇ ଫୁଟିଲା ବୋମା । ତିଗିରିଆ ଥାନା ଅନ୍ତର୍ଗତ ବନମାଳୀପୁର ଗ୍ରାମରେ ଗତକାଲି ବିଳମ୍ବିତ ରାତିରେ ଘଟିଛି ଏହି ଘଟଣା । ତିନୋଟି ବୋମା ମାଡ଼ ହୋଇଛି । ଏହି ବୋମା ମାଡ଼ରେ ଦୁଇଜଣ ଆହତ ହୋଇ ତିଗିରିଆ ମେଡିକାଲରେ ଭର୍ତ୍ତି ହୋଇଛନ୍ତି । ଦୁଇ ଜଣଙ୍କୁ ଅଟକ ରଖିଛି ତିଗିରିଆ ପୋଲିସ ।

ବନମାଳୀପୁର ଗ୍ରାମର ଗ୍ରାମ ସଭାପତି ଚୟନକୁ ନେଇ ବୋମାମାଡ ହୋଇଥିବା ଜଣାପଡିଛି । ତିରିଶ ବର୍ଷ ଧରି ଗ୍ରାମର ସଭାପତି ଭାବରେ ଗ୍ରାମର ଶରତ ରାଉତ ଦାୟିତ୍ୱ ତୁଲାଉ ଥିବା ବେଳେ ଏହାକୁ ତିନିଜଣ ଲୋକ ବିରୋଧ କରୁଥିବା ଜଣାପଡିଛି । ତେବେ ଏହାକୁ କେନ୍ଦ୍ର କରି ଗ୍ରାମରେ ଦୀର୍ଘଦିନ ଧରି ଅଶାନ୍ତ ରହୁଥିବା ସୂଚନା ମିଳିଛି ।

ତେବେ ଫଳ ସ୍ୱରୂପ ଗତକାଲି ବିଳମ୍ବିତ ରାତିରେ ସେହି ତିନି ଜଣ ବ୍ୟକ୍ତି ଗ୍ରାମର ସଭାପତି ଥିବା ଶରତ ରାଉତଙ୍କ ଘର ଉପରକୁ ବୋମାମାଡ କରିଥିବା ଅଭିଯୋଗ ହୋଇଛି । ଏହି ବୋମା ମାଡ଼ରେ ଶରତ ରାଉତଙ୍କ ପୁଅ ଓ ଝିଆରୀ ଆହାତ ହୋଇଥିବା ଦେଖିବାକୁ ମିଳିଛି । ସେପଟେ ବୋମା ମାଡ଼ ପରେ ଏବେ ଚାପା ଉତ୍ତେଜନା ଦେଖା ଦେଇଛି ।