ୟୁକ୍ରେନରେ ଏପର୍ଯ୍ୟନ୍ତ ୧୪୧୭ ଲୋକଙ୍କ ମୃତ୍ୟୁ, ୨୦୦୦ରୁ ଊର୍ଦ୍ଧ୍ବ ଆହତ

ରୁଷୋ-ୟୁକ୍ରେନ ଯୁଦ୍ଧକୁ ଏକ ମାସରୁ ଅଧିକ ସମୟ ବିତି ଯାଇଥିଲେ ମଧ୍ୟ ଉଭୟ ଦେଶ ମଧ୍ୟରେ ତିକ୍ତତା କମିବାର କୌଣସି ଆଭାସ ମିଳୁନାହିଁ । ଏହି ଯୁଦ୍ଧରେ ଏପର୍ଯ୍ୟନ୍ତ ଶହ ଶହ ସୈନିକ ଏବଂ ନିରୀହ ସାଧାରଣ ନାଗରିକ ପ୍ରାଣ ହରାଇଛନ୍ତି। ମିଳିତ ଜାତିସଂଘର ମାନବାଧିକାର ଏଜେନ୍ସି ଅନୁଯାୟୀ ବର୍ତ୍ତମାନ ପର୍ଯ୍ୟନ୍ତ ୟୁକ୍ରେନରେ ୧୪୧୭ ସାଧାରଣ ନାଗରିକଙ୍କ ମୃତ୍ୟୁ ହୋଇଛି ଏବଂ ୨୦୩୮ ଜଣ ଆହତ ହୋଇଛନ୍ତି। ରୁଷ ଆକ୍ରମଣରେ ସବୁଠୁ ଅଧିକ କ୍ଷତିଗ୍ରସ୍ତ ୟୁକ୍ରେନର ଦୁଇ ସହର ମାରିୟୁପୋଲ ଏବଂ ଇରପିନରେ ମୃତାହତ ଙ୍କ ସମ୍ପର୍କରେ କୌଣସି ତଥ୍ୟ ନାହିଁ |

ଜାତିସଂଘ ଏଜେନ୍ସି ବିଶ୍ବାସ କରେ ଯେ ମାରିୟୁପୋଲ, ଇରପିନ୍, ଇଜିୟମ୍ ଏବଂ ଭଲନୋଭାକାରେ ମୃତ୍ୟୁ ସଂଖ୍ୟା ବେଶ୍ ଅଧିକ ହୋଇପାରେ। ରୁଷ ସୈନିକ ପଛକୁ ହଟିବା ପରେ ୟୁକ୍ରେନ ରାଜଧାନୀ କିଭ୍ ଉପକଣ୍ଠ ଓବ୍ଲାଷ୍ଟରୁ ୪୧୦ ସାଧାରଣ ନାଗରିକଙ୍କ ମୃତଦେହ ଉଦ୍ଧାର କରାଯାଇଛି। ଅନ୍ୟପକ୍ଷରେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି କହିଛନ୍ତି ଯେ ମାରିୟୁପୋଲରେ ପ୍ରାୟ ୧.୫ ଲକ୍ଷ ଲୋକ ଏବେ ବି ଫସି ରହିଛନ୍ତି। ସେ କହିଛନ୍ତି ଯେ ମାରିୟୁପୋଲ ବାହାରେ ମାନବିକ କରିଡର ସମ୍ପର୍କରେ ରୁଷର ଦଖଲକାରୀ ବାହିନୀ ସହ ଆଲୋଚନା କରିବା କିମ୍ବା ମାନବିକ ସହାୟତା ଆଣିବା ସମ୍ଭବ ନୁହେଁ।

ଏହା ବ୍ୟତୀତ ୟୁକ୍ରେନ କଳାକାର ତଥା ରାଷ୍ଟ୍ରପତି ଜେଲେନସ୍କି ଗ୍ରାମି ପୁରସ୍କାରରେ ଉପସ୍ଥିତ ଦର୍ଶକଙ୍କୁ ସମ୍ବୋଧିତ କରିଛନ୍ତି। ଜେଲେନସ୍କି ଏକ ପୂର୍ବ ରେକର୍ଡ ହୋଇଥିବା ଭିଡିଓରେ କହିଛନ୍ତି, ‘ଆମେ ରୁଷ ସହିତ ଯୁଦ୍ଧ କରୁଛୁ, ଯାହା ବିସ୍ଫୋରଣ ସହିତ ଏକ ପ୍ରକାର ନିରବତା ଆସିଛି। ଏହା ମୃତକଙ୍କ ନିରବତା | ଆପଣମାନେ ସଙ୍ଗୀତ ମାଧ୍ୟମରେ ଏହି ନୀରବତାକୁ ଦୂର କରନ୍ତୁ ।