ୟୁକ୍ରେନକୁ ମିଗ୍-୨୯ ଯୁଦ୍ଧ ବିମାନ ଦେବାକୁ ପୋଲାଣ୍ଡ ଦେଲା ପ୍ରସ୍ତାବ

ଆଜି ରୁଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧର ୧୪ତମ ଦିନ | ଏହି ଯୁଦ୍ଧ ବର୍ତ୍ତମାନ ଏକ ବିପଜ୍ଜନକ ପର୍ଯ୍ୟାୟରେ ପହଞ୍ଚିଛି। ଆମେରିକା ରୁଷରୁ ତେଲ ଏବଂ ଗ୍ୟାସ ଆମଦାନୀ ଉପରେ ପ୍ରତିବନ୍ଧକ ଲଗାଇଛି | ଅନ୍ୟପଟେ ପୋଲାଣ୍ଡ ନିଜ ସମସ୍ତ ମିଗ -୨୯ ଯୁଦ୍ଧ ବିମାନକୁ ୟୁକ୍ରେନକୁ ଦେବାକୁ ଘୋଷଣା କରିଛି । ତେବେ ପୋଲାଣ୍ଡର ଏହି ପଦକ୍ଷେପ ଚିନ୍ତାର ବିଷୟ ବୋଲି ଆମେରିକା କହିଛି। ଏକ ରିପୋର୍ଟ ଅନୁଯାୟୀ, ୟୁକ୍ରେନ ପାଇଁ ରୁଷ ନିର୍ମିତ ଯୁଦ୍ଧ ବିମାନ ଯୋଗାଇବା ପାଇଁ ପୋଲାଣ୍ଡର ପ୍ରସ୍ତାବକୁ ଆମେରିକା ପ୍ରତ୍ୟାଖ୍ୟାନ କରିଛି। ତେବେ ରୁଷର ଆକ୍ରମଣକୁ ରୋକିବା ପାଇଁ ଆମେରିକା ପୋଲାଣ୍ଡରେ ୨ଟି ପ୍ୟାଟ୍ରିଅଟ୍ କ୍ଷେପଣାସ୍ତ୍ର ମୁତୟନ କରିବ ।

ଏହି ସମୟରେ ଯୁଦ୍ଧରେ ଫସି ରହିଥିବା ସାଧାରଣ ନାଗରିକଙ୍କୁ ଥଇଥାନ କରିବା ପାଇଁ ରୁଷ ବୁଧବାର ସୁମି, ଖାର୍କିଭ, ମାରିଅପୋଲ, ଚେର୍ନିହିଭ, ଜାପୋରିଜିଆ ସହରରେ ଅସ୍ତ୍ରବିରତି ଘୋଷଣା କରିଛି। ଅନ୍ୟପକ୍ଷରେ, ରୁଷ ଏବଂ ବେଲାରୁଷ ଉପରେ ପାଶ୍ଚାତ୍ୟ କଟକଣାକୁ ବିରୋଧ କରୁଥିବା ଚୀନର କମ୍ପାନୀଗୁଡିକ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରେ ବୋଲି ଆମେରିକା କହିଛି। ଆମେରିକାର ବାଣିଜ୍ୟ ସଚିବ ଜିନା ରାଇମୋଣ୍ଡୋ ମଙ୍ଗଳବାର ଏହି ସୂଚନା ଦେଇଛନ୍ତି।