ୟୁକ୍ରେନରୁ ୧୮୨ ଜଣ ଭାରତୀୟଙ୍କୁ ଧରି ମୁମ୍ବାଇରେ ପହଞ୍ଚିଲା ସପ୍ତମ ବିମାନ

ୟୁକ୍ରେନରେ ଫସି ରହିଥିବା ୧୮୨ ଜଣ ଭାରତୀୟ ନାଗରିକଙ୍କୁ ନେଇ ସପ୍ତମ ଅପରେସନ୍ ଗଙ୍ଗା ବିମାନ ମଧ୍ୟ ବୁଖାରେଷ୍ଟ (ରୋମାନିଆ) ରୁ ମୁମ୍ବାଇରେ ପହଞ୍ଚିଛି | କେନ୍ଦ୍ର ମନ୍ତ୍ରୀ ନାରାୟଣ ରାଣେ ଭାରତୀୟ ଛାତ୍ରମାନଙ୍କୁ ମୁମ୍ବାଇ ବିମାନ ବନ୍ଦରରେ ସ୍ବାଗତ କରିଥିଲେ। ଏହାଛଡ଼ା ଅପରେସନ୍ ଗଙ୍ଗାର ଅଷ୍ଟମ ବିମାନ ମଧ୍ୟ ବୁଦାପେଷ୍ଟରୁ ଦିଲ୍ଲୀ ଅଭିମୁଖେ ଯାତ୍ରା କରିଛି ବୋଲି ଜଣେ ଅଧିକାରୀ ସୂଚନା ଦେଇଛନ୍ତି।

ବୈଦେଶିକ ବ୍ୟାପାର ମନ୍ତ୍ରୀ ଜୟଶଙ୍କର ଟୁଇଟ୍ କରି କହିଛନ୍ତି ଯେ ଭାରତୀୟ ନାଗରିକ ସୁରକ୍ଷିତ ନ ଫେରିବା ପର୍ଯ୍ୟନ୍ତ ଆମେ ବିଶ୍ରାମ ନେବୁ ନାହିଁ। ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୟୁକ୍ରେନ ସଙ୍କଟ ଉପରେ ସୋମବାର ସନ୍ଧ୍ୟାରେ ପୁଣି ଏକ ଉଚ୍ଚସ୍ତରୀୟ ବୈଠକ କରିଛନ୍ତି । ସେ କହିଛନ୍ତି ଯେ ଯେ ୟୁକ୍ରେନରୁ ଭାରତୀୟ ଯେପର ସୁରକ୍ଷିତ ଫେରିବେ ସେଥିପାଇଁ ସମଗ୍ର ସରକାରୀ କଳ ୨୪ ଘଣ୍ଟା କାର୍ଯ୍ୟ କରୁଛନ୍ତି ।

ୟୁକ୍ରେନର ସାମ୍ପ୍ରତିକ ପରିସ୍ଥିତି ଉପରେ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଏହା ଦ୍ୱିତୀୟ ଉଚ୍ଚ ସ୍ତରୀୟ ବୈଠକ ଥିଲା। ଏହି ବୈଠକରେ ନିଷ୍ପତ୍ତି ନିଆଯାଇଛି ଯେ ୟୁକ୍ରେନରୁ ଭାରତୀୟଙ୍କ ସ୍ଥାନାନ୍ତର କାର୍ଯ୍ୟ ତଦାରଖ ପାଇଁ ଚାରି କେନ୍ଦ୍ର ମନ୍ତ୍ରୀ ହରଦୀପ ସିଂ ପୁରୀ, ଜ୍ୟୋତିରାଦିତ୍ୟ ସିନ୍ଧିଆ, କିରେନ ରିଜିଜୁ ଏବଂ ଜେନେରାଲ (ଅବସରପ୍ରାପ୍ତ) ଭି.କେ ସିଂହ ୟୁକ୍ରେନର ଚାରି ପଡୋଶୀ ଦେଶକୁ ଯିବେ ।