ବନ୍ଧାହେଲେ ଆଞ୍ଜେଲ ପିହୁ

ଭୁବନେଶ୍ୱର: ସହିଦନଗର ପୋଲିସ କବ୍ଜାରେ ଆଞ୍ଜେଲ ପିହୁ। ଫେସବୁକ୍ରେ ବିଛାଉଥିଲେ ମାୟାଜାଲ। ଆଉ ପୁରୁଷ ବନ୍ଧୁମାନଙ୍କୁ ହନିଟ୍ରାପରେ ଫସାଇ ଲୁଟି ନେଉଥିଲେ ଲକ୍ଷ ଲକ୍ଷ ଟଙ୍କା। ଏଭଳି ଜଣେ ଆଞ୍ଜେଲ ପିହୁଙ୍କ ମାୟାଜାଲ ଭେଦକରି ତାଙ୍କୁ ଗିରଫ କରିଛି ସହିଦ ନଗର ଥାନା ପୋଲିସ। ଗିରଫ ହୋଇଥିବା ମହିଳାଙ୍କ ନିକଟରୁ ୫ ଲକ୍ଷ ଟଙ୍କାର ସୁନା ଗହଣା ଓ ଦେଢ ଲକ୍ଷ ଟଙ୍କା ଜବତ କରିଛି ପୋଲିସ।

କିଛିଦିନର ବନ୍ଧୁତା ଏବଂ ବିଶ୍ୱାସ ଭାଜନ ପରେ ପ୍ରେମ ଜାଲରେ ଫସାଇ ଘରେ ପହଞ୍ଚୁଥିଲେ। ଘରେ ଏକା ଥିବା ସୁଯୋଗ ନେଇ ନିଶା ଔଷଧ ମିଶ୍ରିତ ପ୍ରସାଦ ଖାଇବାକୁ ଦେଇ ଲୁଟ୍ କରୁଥିଲେ। ବାଙ୍କୁଆଳରେ ଜଣେ ବ୍ୟକ୍ତିଙ୍କ ଠାରୁ ଏହିପରି ଭାବେ ଲୁଟିଥିଲେ ୧୦ଲକ୍ଷ ଟଙ୍କାର ସୁନା ଗହଣା ଏବଂ ଏଟିଏମ। ଯାହାକୁ ନେଇ ସହିଦ ନଗର ଥାନାରେ ଅଭିଯୋଗ କରିଥିଲେ ଶିକାର ହୋଇଥିବା ବ୍ୟକ୍ତି । ଅଭିଯୋଗ ପରେ ତଦନ୍ତ କରି ପିହୁକୁ ପୁରୀରୁ ଗିରଫ କରିଛି ପୋଲିସ। ପୂର୍ବରୁ କୋଲକତା ପୋଲିସ ପିହୁକୁ ଏହିପରି ମାମଲାରେ ଗିରଫ କରିଥିଲା।

ଆଞ୍ଜେଲ ପିହୁକୁ ଗିରଫ କରି କୋର୍ଟ ଚାଲାଣ କରିବା ପରେ ଆଉ କେଉଁ ମାନଙ୍କ ଠାରୁ କେତେ ପରିମାଣର ଟଙ୍କା ଏବଂ ଅଳଙ୍କାର ହନୀ ଟ୍ରାପ ଦ୍ୱାରା ଲୁଟ କରାଯାଇଛି ରିମାଣ୍ଡରେ ଅଣାଯିବା ପରେ ଜଣାପଡିବ ବୋଲି ସୁଚନା ଦେଇଛନ୍ତି ଏସିପି ସଂଜୀବ ଶତପଥୀ।