ବ୍ରାଣ୍ଡେଡ ଲେବଲ୍ ତଳେ ନକଲି ମୃଦୁ ପାନୀୟ

ଭୁବନେଶ୍ୱର: ପୁଣି ରାଜଧାନୀରୁ ଠାବ ହେଲା ନକଲି କାରଖାନା । ମଞ୍ଚେଶ୍ୱର ଶିଳ୍ପାଞ୍ଚଳରେ ନକଲି ମୃଦୁ ପାନୀୟ କାରଖାନାକୁ ପୋଲିସ ଠାବ କରିଛି । ପୋଲିସ ଉକ୍ତ କାରଖାନାରେ ଚଢାଉ ଜାରି ରଖିଛି । ତେବେ ଚଢାଉ ସମୟରେ ବିପୁଳ ପରିମାଣର ନକଲି ସାମଗ୍ରୀ ଠାବ ହୋଇଛି । ବିଭିନ୍ନ ନାମୀ କମ୍ପାନୀର ନାମ ବଦଳାଇ ନକଲି ଜିନିଷ ବିକ୍ରି କରାଯାଉଥିବା ଅଭିଯୋଗ ଆସିଛି |

ସୂଚନାନୁଯାୟୀ, କିଛିଦିନ ହେବ ଭୁବନେଶ୍ୱର ମଞ୍ଚେଶ୍ୱର ଶିଳ୍ପାଞ୍ଚଳରେ ନକଲି ମୃଦୁ ପାନୀୟ କାରଖାନା ଚାଲିଥିବା ନେଇ ଅଭିଯୋଗ ପାଇଥିଲା ପୋଲିସ । ଅଭିଯୋଗ ପାଇବା ପରେ ସ୍ୱତନ୍ତ୍ର ଟିମ୍ ଗଠନ କରାଯାଇ ନକଲି ମୃଦୁ ପାନୀୟ କାରଖାନାରେ ଚଢାଉ କରା ଯାଇଥିଲା । ଚଢାଉ ସମୟରେ ଘଟଣା ସ୍ଥଳରେ ବିପୁଳ ପରିମାଣର ନକଲି ସାମଗ୍ରୀ ଠାବ ହୋଇଛି । ଏହା ବ୍ୟତୀତ ବିଭିନ୍ନ ନାମୀ କମ୍ପାନୀର ନାମ ବଦଳାଇ ନକଲି ଜିନିଷ ବିକ୍ରି କରାଯାଉଥିବା ସୂଚନା ମିଳିଛି |

ତେବେ ରାଜ୍ୟରେ କାୟା ବିସ୍ତାର କରିଚାଲିଛି ନକଲି ସାମଗ୍ରୀର କାରଖାନା | ସିଲଭର ସିଟି କଟକ ଏବେ ନକଲି କାରଖାନାର ହବ୍ ପାଲଟିଥିବା ସମୟରେ ରାଜ୍ୟର ବିଭିନ୍ନ ଅଞ୍ଚଳରେ ନକଲି ଖାଦ୍ୟ ସାମଗ୍ରୀ କାରଖାନାରେ ଚଢାଉ ଜାରି ରହିଛି । କଟକ, ସମ୍ବଲପୁର, ଯାଜପୁର, ଅନୁଗୁଳ ଆଦି ଜାଗାରେ ନକଲି କାରଖାନାମାନ ଠାବ ହୋଇଛି । ଏହିସବୁ କାରଖାନାରୁ ବିପୁଳ ପରିମାଣ ନକଲି ସାମଗ୍ରୀ ଜବତ ହୋଇଛି । ତେବେ ଦିନକୁ ଦିନ ବଢୁଥିବା ନକଲି ସାମଗ୍ରୀ କାରଣରୁ ଖାଉଟି ଏବେ ସମ୍ପୂର୍ଣ୍ଣ ଚିନ୍ତାରେ ପଡ଼ିଯାଇଛନ୍ତି | ନକଲି ସାମଗ୍ରୀ ବିକ୍ରି କରି ଲୋକଙ୍କ ଜୀବନ ସହ ଖେଳୁଛନ୍ତି ଠକ |