ଘରେ ପଶିଲା ସ୍କର୍ପିଓ, ଜଣେ ମୃତ
ନୂଆପଡ଼ା: ଘର ଭିତରେ ପଶିଗଲା ସ୍କର୍ପିଓ । ଘରେ ସ୍କର୍ପିଓ ପଶିଯିବା ଫଳରେ ଘର ଭିତରେ ଥିବା ମହିଳାଙ୍କ ମୃତ୍ୟୁ ଘଟିଥିବା ବେଳେ ୨ ଜଣ ଗୁରୁତର ଆହତ ହୋଇଛନ୍ତି। ଆଜି ଏହିଭଳି ସାଙ୍ଘାତିକ ଦୁର୍ଘଟଣା ନୂଆପଡ଼ା ଜିଲ୍ଲା ଖଡିଆଳ ଥାନା ଅଞ୍ଚଳରେ ଘଟିଛି । ଖଡିଆଳ-ବୋଡେନ ରାସ୍ତା ପାର୍ଶ୍ୱ ଗଡ଼ରାମୁଣ୍ଡା ଗାଁରେ ନରେଶ ସିଂହଙ୍କ ଘର| ଆଜି ଦିନ ଦ୍ୱି ପ୍ରହରେ ଘରେ ନରେଶ, ତାଙ୍କ ସ୍ତ୍ରୀ ନମିତା ଓ ୮ ବର୍ଷର ପୁଅ ଘରେ ଥିବା ସମୟରେ ଖଡିଆଳରୁ ବୋଡେନ୍ ଅଭିମୁଖେ ଯାଉଥିବା ସ୍କର୍ପିଓ କାନ୍ଥ ଭାଙ୍ଗି ନରେଶଙ୍କ ଘର ଭିତରେ ପଶି ଯାଇଥିଲା । ଯାହା ଫଳରେ ଘଟଣା ସ୍ଥଳରେ ନମିତାଙ୍କ ମୃତ୍ୟୁ ହୋଇଯାଇଥିଲା । ତେବେ ନରେଶ ଓ ତାଙ୍କ ପୁଅ ଗୁରୁତର ଆହତ ହୋଇଛନ୍ତି। ସେମାନଙ୍କୁ ଗୁରୁତର ଅବସ୍ଥାରେ ମେଡିକାଲ୍ରେ ଭର୍ତ୍ତି କରାଯାଇଛି।
ଦୁର୍ଘଟଣା ପରେ ଗାଁରେ ତୀବ୍ର ଉତ୍ତେଜନା ପ୍ରକାଶ ପାଇଛି। ଉତ୍ତ୍ୟକ୍ତ ଲୋକେ ଦୁର୍ଘଟଣା ଘଟାଇଥିବା ସ୍କର୍ପିଓ ଚାଳକଙ୍କୁ ମାରପିଟ୍ କରିଥିଲେ । ଖବର ପାଇ ଖଡିଆଳ ଥାନା ପୁଲିସ ଗାଁରେ ପହଞ୍ଚି ସ୍କର୍ପିଓକୁ ଉଦ୍ଧାର କରିଥିଲା । ମାତ୍ର ଗାଁ ଲୋକେ ପୁଲିସ ଗାଡ଼ିକୁ ନ ଛାଡ଼ି କ୍ଷତିପୂରଣ ବାବଦକୁ ୫୦ ଲକ୍ଷ ଟଙ୍କା ଦାବି କରି ରାସ୍ତା ରୋକ କରିଥିଲେ |