କୋଏଲ ନଦୀରେ ଛାତ୍ର ବୁଡ଼ି ଘଟଣାରେ ତୃତୀୟ ଛାତ୍ରର ମୃତଦେହ ଉଦ୍ଧାର

ରାଉରକେଲାର କୋଏଲ ନଦୀରେ ଛାତ୍ର ବୁଡ଼ି ଘଟଣାରେ ଆଉ ଜଣେ ଛାତ୍ରଙ୍କ ମୃତଦେହ ଉଦ୍ଧାର କରାଯାଇଛି। ଗତକାଲି ଦୁଇଜଣ ଛାତ୍ରଙ୍କ ମୃତଦେହ ଉଦ୍ଧାର କରାଯାଇଥିବା ବେଳେ ଆଜି ତୃତୀୟ ଛାତ୍ର କୌଶିକ ମଲ୍ଲିକଙ୍କ ମୃତଦେହ ଉଦ୍ଧାର କରାଯାଇଛି। ଗତକାଲି ଏକ ଇଂରାଜୀ ବିଦ୍ୟାଳୟର କିଛି ଛାତ୍ର ବଣଭୋଜି କରିଵାକୁ ଯାଇଥିଲେ । କୋଏଲ ନଦୀର ଜାମସେରା ଘାଟରେ ଗାଧୋଇବା ସମୟରେ ଜଳ ସ୍ରୋତରେ ୩ ଜଣ ଦଶମ ଶ୍ରେଣୀ ଛାତ୍ର ଭାସିଯାଇଥିଲେ। ସ୍ଥାନୀୟ ଲୋକେ ଏବଂ ଅଗ୍ନିଶମ ବିଭାଗ କର୍ମଚାରୀ ବହୁ ଖୋଜାଖୋଜି ପରେ ୨ ଜଣ ଛାତ୍ରଙ୍କ ମୃତଦେହ ଉଦ୍ଧାର କରିଥିଲେ ଏବଂ ଆଜି ଆଉ ଜଣେ ଛାତ୍ରଙ୍କ ମୃତଦେହ ଉଦ୍ଧାର କରାଯାଇଛି ।

ତେବେ ଏହି ୩ ମୃତକ ହେଲେ ରୂପେଶ ପ୍ରସାଦ, ସୁଜନ ଶର୍ମା ଏବଂ କୌଶିକ ମଲ୍ଲିକ। ରାଉରକେଲାର ଦୀପିକା ସ୍କୁଲରେ ଏହି ୩ ଜଣ ଛାତ୍ର ଦଶମ ଶ୍ରେଣୀରେ ପାଠ ପଢ଼ନ୍ତି। ବଣ ଭୋଜି ପାଇଁ ୯ ଜଣ ସାଙ୍ଗ ଏକାଠି ଯାଇଥିବା ସମୟରେ ୩ ଛାତ୍ର କୋଏଲ ନଦୀରେ ଗାଧୋଇବା ବେଳେ ବୁଡ଼ି ଯାଇଥିଲେ । ତେବେ ବନ୍ଧମୁଣ୍ଡା ପୋଲିସ ଏନେଇ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଜାରି ରଖିଛି ।