ବିଧାନସଭାରେ ଉଠିଲା ପ୍ରତିମୂର୍ତ୍ତି ରଙ୍ଗ ବଦଳାଇବା ପ୍ରସଙ୍ଗ
ପ୍ରବାଦ ପୁରୁଷ ବିଜୁ ବାବୁଙ୍କ ପ୍ରତିମୂର୍ତ୍ତି ରଙ୍ଗ ବଦଳାଇବା ଘଟଣାକୁ ନେଇ ରାଜନୈତିକ ହଟଚମଟ ଜାରି ରହିଥିବା ବେଳେ ଆଜି ଏ ପ୍ରସଙ୍ଗ ବିଧାନସଭାରେ ଉଠାଇଛନ୍ତି ବାଙ୍କୀ ବିଧାୟକ ଦେବୀରଞ୍ଜନ ତ୍ରିପାଠୀ। ବରପୁତ୍ରମାନଙ୍କୁ ସମ୍ମାନ ଦେଇ ଓଡ଼ିଶା ପକ୍ଷ ପାଳନ କଥା ସରକାର କହୁଥିବା ବେଳେ କଟକରେ ଉତ୍କଳ ଦିବସ ପୂର୍ବ ଦିନ ବିଜୁ ବାବୁଙ୍କ ପ୍ରତିମୂର୍ତ୍ତିର ରଙ୍ଗ ବଦଳାଯିବାର ଉଦ୍ଦେଶ୍ୟ କ’ଣ ବୋଲି ଦେବୀ ପ୍ରଶ୍ନ କରିଥିଲେ। କେଉଁଠି ବିଜୁ ପ୍ରତିମୂର୍ତ୍ତିର ମୁଣ୍ଡ କାଟି ଦିଆଯାଉଛି ତ କେଉଁଠି ରଙ୍ଗ ବଦଳାଇ ଦିଆଯାଉଛି। ବିଜୁବାବୁଙ୍କ ପ୍ରତି ଏଭଳି ଅସମ୍ମାନକୁ ବରଦାସ୍ତ କରାଯିବ ନାହିଁ। ସରକାର ତ୍ରୁଟି ସୁଧାରନ୍ତୁ। ଏଭଳି ଯିଏ କରିଛି, ତା’ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ଦେବୀ କହିବା ସହିତ ଏ ପ୍ରସଙ୍ଗରେ ବାଚସ୍ପତିଙ୍କ ରୁଲିଂ ଦାବି କରିଥିଲେ। ମହାନଦୀବିହାର ଓ ପୋତାପୋଖରୀରେ ଥିବା ବିଜୁ ବାବୁଙ୍କ ପ୍ରତିମୂର୍ତ୍ତିକୁ ସବୁଜରୁ ତମ୍ବା ରଙ୍ଗ କରି ଦିଆଯାଇଥିବା ବେଳେ ହଠାତ୍ ରାତାରାତି ପୁଣି ସବୁଜ ରଙ୍ଗ କରି ଦିଆଯାଇଛି।
ଏ ପ୍ରସଙ୍ଗରେ ଆଜି ମୁହଁ ଖୋଲି ଚୌଦ୍ବାର-କଟକର ପୂର୍ବତନ ବିଧାୟକ ପ୍ରଭାତରଂଜନ ବିଶ୍ବାଳ କହିଛନ୍ତି ଯେ ସେ ଏ ପ୍ରତିମୂର୍ତ୍ତି ରଙ୍ଗ ପରିବର୍ତ୍ତନ ସଂପର୍କରେ ସଂପୂର୍ଣ୍ଣ ଅଜ୍ଞ ଥିଲେ। ଖବରକାଗଜରୁ ଏହା ଜାଣିବା ପରେ ମେୟରଙ୍କ ସହ ଆଲୋଚନା ହୋଇଛି। ବିଜୁ ବାବୁଙ୍କ ପ୍ରତିମୂର୍ତ୍ତି ଯେଉଁଠି ଯେଉଁ ରଙ୍ଗର ଥିଲା, ତାହା ସେହିଭଳି କରିବା ପାଇଁ ପରାମର୍ଶ ଦେଇଛନ୍ତି ବୋଲି ପ୍ରଭାତ କହିଛନ୍ତି। ଅନ୍ୟପଟେ ମେୟର ସୁବାସ ସିଂହ କହିଛନ୍ତି ଯେ ଏଭଳି ରଙ୍ଗ ବଦଳାଯିବାକୁ କଟକ ପୌର ନିଗମ ଅଥବା ଜିଲ୍ଲା ପ୍ରଶାସନ ପକ୍ଷରୁ କାହାକୁ କୁହାଯାଇ ନାହିଁ। କେତେକ ବ୍ୟକ୍ତି ଶାସକ ଦଳକୁ ଖୁସି କରିବା ପାଇଁ ହୁଏତ ଏଭଳି ରଙ୍ଗ ବଦଳାଇ ଦେଉଛନ୍ତି। ତେଣୁ ବିଜୁ ବାବୁଙ୍କର ଅଥବା ଅନ୍ୟ ବରପୁତ୍ରଙ୍କର ଯେଉଁଠି ବି ରଙ୍ଗ ବଦଳା ଯାଇଥିବ, ତାହା ମୂଳ ରଙ୍ଗକୁ ଫେରାଇ ଅଣାଯିବ। ଆବଶ୍ୟକ ହେଲେ ଘଟଣାର ତଦନ୍ତ କରି କାର୍ଯ୍ୟାନୁଷ୍ଠାନ ହେବ ବୋଲି ମେୟର ସୁବାସ ସିଂହ କହିଛନ୍ତି। ଗତକାଲି ବିଜେଡିର ରାଜ୍ୟସଭା ସଦସ୍ୟ ଦେବାଶିଷ ସାମନ୍ତରାୟ ଏ ପ୍ରସଙ୍ଗରେ ବିଧାୟକ ସୌଭିକ ବିଶ୍ବାଳ ଅଥବା ପୂର୍ବତନ ବିଧାୟକ ପ୍ରଭାତରଂଜନ ବିଶ୍ବାଳ କାହିଁକି ପ୍ରତିବାଦ କରି ସାମନାକୁ ଆସୁ ନାହାନ୍ତି ବୋଲି ପ୍ରଶ୍ନ କରିଥିବା ବେଳେ ଆଜି ପ୍ରଭାତ ପ୍ରତିମୂର୍ତ୍ତିକୁ ପୂର୍ବ ରଙ୍ଗକୁ ଫେରାଇ ଆଣିବା ସପକ୍ଷରେ ମତ ରଖିଛନ୍ତି।