ଡିଏଭି ପୋଖରୀପୁଟରେ ‘‘ବୈଜ୍ଞାନିକ ଦୃଷ୍ଟିଭଙ୍ଗୀର ବିକାଶ” ସମ୍ପର୍କିତ ସଚେତନତା କାର୍ଯ୍ୟକ୍ରମ ପାଳିତ
ଭୁବନେଶ୍ୱର : ୧୬.୦୧.୨୦୨୫ ଡିଏଭି ପୋଖରୀପୁଟରେ ବଦ୍ୟାର୍ଥୀଙ୍କ ମଧ୍ୟରେ ବିଜ୍ଞାନମନସ୍କତା , ଅନାସକ୍ତଭାବ ,ଯୁକ୍ତିଯୁକ୍ତତା ଓ ଅନ୍ୟମାନଙ୍କ ପ୍ରଭାବରୁ ମୁକ୍ତ ରହି ସ୍ୱାଧୀନ ବିଚାରଧାରା ଭଳି ବିରଳ ଗୁଣର ଅଭିବୃଦ୍ଧି ନିମନ୍ତେ ‘‘ବୈଜ୍ଞାନିକ ଦୃଷ୍ଟିଭଙ୍ଗୀର ବିକାଶ”ଶୀର୍ଷକ ଆଲୋଚନା ଚକ୍ର ଏକ ବିଜ୍ଞାନ ଓ ପରିବେଶ ପ୍ରେମୀ ସଂସ୍ଥା ତଥା ଡିଏଭି ପୋଖରୀପୁଟର ମିଳିତ ଉଦ୍ୟମରେ ଆୟୋଜିତ ହୋଇଥିଲା । ଏହି ଅନୁଭବାତ୍ମକ କାର୍ଯ୍ୟକ୍ରମକୁ ଅଭ୍ୟାଗତ ଅତିଥିମାନେ ପ୍ରଦୀପ ପ୍ରଜ୍ଜ୍ୱଳନ ପୂର୍ବକ ଶୁଭାରମ୍ଭ କରିଥିଲେ । ବିଦ୍ୟାଳୟର ଅଧ୍ୟକ୍ଷ ଶ୍ରୀଯୁକ୍ତ ବିପିନ କୁମାର ସାହୁ ସ୍ୱାଗତ ଭାଷଣ ଦେବାସହିତ ବିଜ୍ଞାନର ପ୍ରଗତିରେ ଦେଶର ପ୍ରଗତି ସମ୍ଭବ ବୋଲି ନିଜର ଅଭିମତ ରଖିଥିଲେ । ମୁଖ୍ୟ ଅତିଥି ଭାବେ ବିପିଓଟିର ପୂର୍ବତନ କୁଳପତି ପ୍ରଫେସର ଓଁମ୍କାର ନାଥ ମହାନ୍ତି ଉପସ୍ଥିତ ରହି ପ୍ରକୃତି ହିଁ ପ୍ରକୃତ ଶିକ୍ଷକ ବୋଲି ଅଭିମତ ଦେବାସହିତ ନିଜର ଦିଗ୍ଦର୍ଶନର ରୂପରେଖକୁ ଉପସ୍ଥାପନ କରିଥିଲେ । ନାଲ୍କୋର ପୂର୍ବତନ ଜେନେରାଲ୍ ମ୍ୟାନେଜର ଡ. ଚିତ୍ତରଞ୍ଜନ ମିଶ୍ର ଉପସ୍ଥିତ ରହି ବିଜ୍ଞାନ ଉତ୍ପତ୍ତି ଦିଗ-ଦିଗନ୍ତ ଉପରେ ଆଲୋକପାତ କରିବା ସହିତ ବିଜ୍ଞାନଯୁଗର ଛାତ୍ରଛାତ୍ରୀଙ୍କୁ କେତେକ ସାଧାଣ ଜ୍ଞାନ ସ୍ମରଣୀୟ କରାଇଥିଲେ । ସମ୍ମାନିତ ଅତିଥିଭାବେ ଖଲ୍ଲିକୋଟ ୟୁନିଟାରୀ ବିଶ୍ୱବିଦ୍ୟାଳୟର ପୂର୍ବତନ କୁଳପତି କର୍ଣ୍ଣେଲ. ପ୍ରୋଫେସର. ଡ. ପ୍ରଫୁଲ୍ଲ କୁମାର ମହାନ୍ତି ଉପସ୍ଥିତ ରହି ପ୍ରକୃତି ହିଁ ପ୍ରକୃତ ପରୀକ୍ଷାଗାର ବୋଲି କହିବାସହିତ ବିଜ୍ଞାନର ସଂଜ୍ଞା ଜାଣିବାକୁ ହେଲେ ପାଞ୍ଚଟି (5-W) – Why , What,When,Which,Where ଉପରେ ଗୁରୁତ୍ୱ ଦେବାକୁ ପଡ଼ିବ ବୋଲି ନିଜର ଅଭିମତ ରଖିଥିଲେ । ଏକ ବିଜ୍ଞାନ ଓ ପରିବେଶ ପ୍ରେମୀ ସଂସ୍ଥାର ସଂସ୍ଥାପକ ଶ୍ରୀ ନିହାର ରଞ୍ଜନ ଆଚାର୍ଯ୍ୟ ପ୍ରକୃତିର ବିଭିନ୍ନ ନିୟମକୁ ବୁଝିବା ହେଉଛି ବିଜ୍ଞାନ ଓ ତାହା ସହିତ ନିଜକୁ ଖାପ ଖୁଆଇ ଚଳିଲେ ପ୍ରକୃତି ବଞ୍ଚିବ ବୋଲି ନିଜର ଅଭିଭାଷଣରେ କହିଥିଲେ । ଡିଏମ୍ ସ୍କୁଲର ହେଡ଼ମାଷ୍ଟର ଶ୍ରୀଯୁକ୍ତ ଅଖିଳେଶ୍ୱର ମିଶ୍ର ବିଦ୍ୟାର୍ଥୀଙ୍କୁ ବିଜ୍ଞାନ ମନସ୍କ ହେବା ଉପରେ ଗୁରୁତ୍ୱ ଦେଇଥିଲେ । ଓୟୁଏଟିର ସହାୟକ ପ୍ରଫେସର ଅଜିତ କୁମାର ନାୟକ ବିଜ୍ଞାନକୁ ପ୍ରଚାର ପ୍ରସାର କ୍ଷେତ୍ରରେ ବିଦ୍ୟାର୍ଥୀଙ୍କ ଭୂମିକାକୁ ଅବଗତ କରାଇଥିଲେ । ଏହି ଅବସରରେ ମାନ୍ୟଗଣ୍ୟ ଅଭ୍ୟାଗତ ଅତିଥିଙ୍କ କରକମଳରେ ମୁଖ୍ୟ ଲେଖକ ଶ୍ରୀ ନିହାର ରଞ୍ଜନ ଆଚାର୍ଯ୍ୟ ଏବଂ ସହ ଲେଖକ ଡ. ଅଜିତ କୁମାର ନାୟକଙ୍କ ଦ୍ୱାରା ରଚିତ “Exploring the Wonders: A Complete Guide to Scientific Thinking” ପୁସ୍ତକ ଉନ୍ମୋଚିତ ହେବା ସହିତ ଲୋକାର୍ପିତ କରାଯାଇଥିଲା । ଏହାର ମୁଖ୍ୟ ଉଦ୍ଦେଶ୍ୟ ବିଦ୍ୟାର୍ଥୀଙ୍କୁ ବୈଜ୍ଞାନିକ ଦୃଷ୍ଟିଭଙ୍ଗୀ ସହିତ ପରିଚିତ କରାଇବା ତଥା ଏକ ବିକାଶଶୀଳ ରାଷ୍ଟ୍ରଗଠନରେ ସହାୟକ ହେବା । କେ.ଟି. ଗ୍ଲୋବାଲ ସ୍କୁଲ ଉପାଧ୍ୟକ୍ଷ ଡ. ରିଙ୍କୁ ଷଡ଼ଙ୍ଗୀ ଉନ୍ମୋଚିତ ପୁସ୍ତକର ସମୀକ୍ଷା କରିଥିଲେ । NCERT ର ପୂର୍ବତନ ପ୍ରଫେସର ଡ. ଜୋତ୍ସ୍ନା ମହାପାତ୍ର ବିଜ୍ଞାନ ସମ୍ବନ୍ଧିତ ଅନେକ ସୁନ୍ଦର କଥା କହିଥିଲେ । ଟ୍ରଷ୍ଟର କାର୍ଯ୍ୟକାରୀ ମ୍ୟାନେଜିଂ ଟ୍ରଷ୍ଟି ଶ୍ରୀମତୀ ଲୋପାମୁଦ୍ରା ମିଶ୍ର ବୈଜ୍ଞାନିକ ଦୃଷ୍ଟିଭଙ୍ଗୀକୁ ବଢ଼ାଇବା ପାଇଁ ଅନେକ ସହଜ ଉପାୟ ନିଜ ବକ୍ତବ୍ୟରେ ରଖିଥିଲେ । ଏହି କାର୍ଯ୍ୟକ୍ରମରେ ବିଜ୍ଞାନକୁ ପ୍ରଚାର ଓ ପ୍ରସାର କରିବାରେ ଛାତ୍ର, ଛାତ୍ରୀମାନେ ନିଜ ନିଜର ଚିନ୍ତନ ପ୍ରକ୍ରିୟା ସହିତ ନିଜ ସିଦ୍ଧାନ୍ତ ଓ ମତ ଉପସ୍ଥାପିତ କରିଥିଲେ । ପରିଶେଷରେ ବିଦ୍ୟାର୍ଥୀଙ୍କୁ ସୁସ୍ଥ ପରିବେଶ ଏବଂ ବୃକ୍ଷର ଉପକାରିତା ସମ୍ବନ୍ଧିତ ଏକ ଚମତ୍କାର ଭିଡ଼ିଓ ପ୍ରଦର୍ଶନ କରାଯିବା ସହ କୃତି ବିଦ୍ୟାର୍ଥୀଙ୍କୁ ମାନପତ୍ର ତଥା ବରେଣ୍ୟ ଅତିଥିଙ୍କୁ ଉପଢୌକନ , ଔଷଧୀୟ ବୃକ୍ଷ , ବିଦ୍ୟାଳୟର ପତ୍ରିକା ଦେଇ ସମ୍ମାନିତ କରାଯାଇଥିଲା । ସଂପୂର୍ଣ୍ଣ କାର୍ଯ୍ୟକ୍ରମକୁ ବରିଷ୍ଠ ନିରୀକ୍ଷିକା ଡ.ସ୍ମରଣିକା ପଟ୍ଟନାୟକ ସୁନ୍ଦର ଭାବରେ ସଂଯୋଜନା କରିଥିଲେ ।